Atualità
L'ert sciöche spersa d'identificaziun culturala ala Trienala Ladina
Colié l’ert contemporanea cun la cultura ladina: cina de jügn dl 2017 sarál da odëi tl Museum Ladin la 5a ediziun Trienala ladina inaugurada incö a San Martin.
Hubert Kostner, Gabriele Grones, Nessi (Vanessa Layher), Notta Caflisch, Simon Perathoner y Andreas Senoner: chisc é i inoms di artisć y dles artistes che á davagné la 5aTrienala Ladina. La mostra coletiva de ert contemporanea vëgn organisada vigni trëi agn dal Museum ladin Ciastel de Tor y é gnüda daurida incö, vëndres ai 09 de setëmber, dal diretur de Departimënt Valentino Pagani, dal diretur dl Museum Ladin Stefan Planker, dal deputat ladin Daniel Alfreider y dala curadëssa dla mostra Karin Pernegger adöm ai artisć y ales artistes. Le diretur Departimënt Valentino Pagani á sotligné, en rapresentanza dl assessur por la cultura ladina Florian Mussner, che la Trienala Ladina é "na manifestaziun dër importanta por de plü aspec, nia ma deache ara ti pita na paladina ai artisć por podëi se presenté a n publich ampl, mo ince por promöie l'ert tles valades ladines y la cultura contemporanea amesa la popolaziun." Implü vëgnel ince amplié tres chëstes manifestaziuns dl Museum Ladin la promoziun dla cultura ladina che resta na priorité alta dl assessorat por i museums de Mussner, dantadöt por renforzé le bëgn cultural imaterial dl grup linguistich ladin, insciö le diretur Pagani. Por le deputat ladin Daniel Alfreider ne é la Trienala Ladina nia ma na scëmpla mostra d'ert, mo na testimonianza de gran valüta dla cultura ladina contemporanea. La curadëssa dla mostra Karin Pernegger á spo splighé le conzet dla mostra y les tematiches desvalies che é gnüdes tratades dai artisć y dales artistes.
La 5. Trienala Ladina vëiga l’ert sciöche lerch d’identificaziun culturala che é gnüda dada inant, sciöche le lingaz ladin é gnü dé inant a usc por generaziuns intieres tles cin valades – Gherdëna y Val Badia tl Südtirol, Fascia tla provinzia de Trënt, sciöche ince Fodom y Ampëz tla provinzia de Belun, insciö ince tl Friul y ti Grijuns tla Svizera – y crësc cun prosperité tl vers dl dagní. Les artistes y i artisć inviá é gnüs influenzá te na manira desvalia da chësc raiun linguistich y porchël tolunse l’ocajiun pro le iubileum dla cuinta ediziun dla Trienala Ladina da integré tl conzet dla mostra l'identité regionala sciöche componënta visuala. Le titul High Five ne se referësc nia ma ala forma de salüt y de sëgn cun la man americana o ó festejé la cuinta ediziun dla Trienala, mo rapresentëia le raiun cultural cun sües munts che s'arvërj cuntra le cil y sües cin valades che se destira danterfora. Porchël fej le design dla mostra referimënt ales mostres classiches dles trohts tradizionales dles valades, propi sciöche la mostra dla troht dla Val Badia abelësc la parüda dla Trienala. Insciö vëgnel aposta tut ca le tesciü che coliëia tradizionalmënter pro la troht les valades, sciöche momënt de rafiguraziun dla mostra. Ince les artistes y i artisć inviá ti vá pormez y stlarësc te sües operes la tematica dl'identité y sües atribuziuns cun prospetives artistiches desvalies. La cuinta Trienala Ladina mostra de ci material che les artistes y i artisć dla generaziun nöia é fac rapresentan te na manira consecuënta so presënt y süa realté sura i confins fora y fajon na reflesciun critica lassura.
La Trienala Ladina 2016 á sciöche fin chël da valorisé y sostigní l’ativité artistica ti raiuns ladins ti pitan l’oportunité ai artisć y ales artistes da se fá conësce a n publich ampl y a esperc dla critica artistica. Por le cuinto iade él le Museum Ladin Ciastel de Tor che mët insciö da jí la „kermesse artistica“ plü aspetada tles valades ladines. Tó pert al concurs artistich á podü düc i artisć y les artistes dles valades ladines dles Dolomites (Val Badia, Gherdëna, Fodom, Fascia y Ampëz) dai Grijuns y dal Friul y düc i artisć che á n lian particolar cun la cultura y la storia ladina. I artisć davagnadus é gnüs chiris fora danter 44 candidatöres da na iuria internazionala. La mostra sará ciamó da odëi cina la fin de jügn dl 2017 tratan i orars de daurida dl museum.
Por plü informaziuns: Museum Ladin Ćiastel de Tor, strada Tor 65, San Martin, tel. 0474/524020 www.museumladin.it
rc
Galaria dales fotografies
