Atualità
Archeologia: Presentada na ciaspa plü antica de Ötzi
Na scoverta archeologica de morvëia: na ciaspa dal tëmp dan Ötzi, descurida sön la „Bocchetta gelata Ovest“ tla Val Senales, é gnüda presentada incö a Balsan.
„Naota me ponsâi canche i â descurí la scoverta d’isté tl 2003 sön la 'Bocchetta gelata Ovest' sön 3134 metri d’altëza che al ê na ciaspa adorada dai paurs dan da cënt agn y che ê jüda pordüda tratan la conüda de munt y spo l’âi metüda da na pert sciöche recordanza“, á cunté le cartograf Simone Bartolini dl „Istituto Geografico Militare“ de Firenze che á ciafé la ciaspa. Impormó de plü agn dedô á Bartolini rajoné dla scoverta cun la direturia dl Museum archeologich dl Südtirol Angelika Fleckinger y ponsé che al podess ester na ciaspa de valüta storica y ti á surandé la scoverta al Ofize Bëgns archeologics.
Dui istituc d’inrescida spezialisá á spo efetué dataziuns al radiociarbun cun le resultat che la ciaspa é dl eté dl Neolitich danter i agn 3800 cina 3700 dan Crist. La scoverta é insciö plü vedla de Ötzi, che ê mort 3200 agn dan Crist tla Val Senales. La ciaspa cina sëgn plü vedla dl monn é gnüda fata cun lëgn de bedoi.
„Cun la scoverta dla ciaspa ún sëgn la proa che al ê bele porsones che ê presëntes tratan l’eté dl Neolitich tles Alpes y che â ince material a desposiziun por se curí dal tëmp“, á splighé la direturia dl Ofize por i bëgns archeologics Catrin Marzoli. Propi le tlima sön i dlaciá é dër ideal por la conservaziun de materiai organics y ciamó cina dan da de plü dezenns gnôl adoré chëstes sort de cialza, sciöche chëra ciafada te bunes condiziuns sön la „Bocchetta gelata Ovest“, insciö Marzoli. Sön la ciapsa gnarál sëgn fat de plü analises y spo gnará la scoverta metüda a desposiziun dl Museum archeologich, á prezisé la direturia Marzoli.
Le diretur dl Departimënt Valentino Pagani, presënt en rapresentanza dl assessur Florian Mussner, á recordé l’importanza da detlaré les scovertes archeologiches ai ofizi competënc por che ai pois gní analisá. „N mirit spezial ti vá insciö al Ofize di Bëgns archeologics che á analisé de plü ogec por descurí la storia dl Südtirol y por presenté les scovertes ai zitadins“, insciö Pagani. Le comandat dl „Istituto Geografico Militare“ de Firenze Gianfranco Rossi á dit che al é sté plü agn tl Südtirol y che al á odü che la Provinzia se crüzia dër bun dles scovertes ciafades. Rossi á spo ince splighé i compic dl „Istituto Geografico Militare“ che reverda ince la mosoraziun di confins dl Stat y dla Provinzia, i punc geografics, mo ince dé contribuc ala storia dla Provinzia sce poscibl.
rc
Galaria dales fotografies
