Atualità
Referat sön la cherianza linguistica tla Biblioteca Teßmann
La linguista Eva Neuland tignará ai 10 d’otober n referat sön n’adoranza adatada dles parores te situaziuns desvalies dla vita da vigni de.
Che che mina che la bona cherianza sides n relit di tëmps passá, mostra sovënz le dëit sön la jonëza. Da öna na pert él na ciantia de lamënt conesciüda de decadënza dles bones manires y dl lingaz pro la jonëza, dal’atra pert él le punt d’odüda dla linguistica: ara descrí mudaziuns linguistiches,ara ne valutëia nia belatira vigni trasformaziun sciöche decadënza, ara reconësc tl comportamënt linguistich dla jënt jona tröpa creativité y n gran umor y vëiga la jonëza sciöche potenzial inovatif dl lingaz.
Sëgn él n stüde che ti vá do ala chestiun sce ti ultimi tëmps s’ál veramënter mudé la cherianza linguistica. Ti lascia pa manires d’espresciun formales lerch a chëres plü informales? Ne ti dá pa la jonëza plü degöna importanza ala bona cherianza? Y co valutëia pa pordërt la jonëza la bona cherianza convenzionala dles porsones adultes?
La linguista y professuria Eva Neuland dl’Université dl Wuppertal presentará te n referat
en lönesc, ai 10 d’otober,
dales 20:00
tla Biblioteca Teßmann
a Balsan
i pröms resultac de n stüde sön le comportamënt linguistich dla jonëza y inviarára dedô le publich a tó pert ala discusciun sön la chestiun de co che i jogn dess se comporté canche les manires de comportamënt linguistich se müda. La manifestaziun vëgn organisada dala Biblioteca provinziala Dr. Friedrich Teßmann deboriada cun la Gesellschaft für deutsche Sprache/Sënta da Balsan.
rc
