Atualità
„La diversité linguistica y culturala é na richëza“
Te n palaz Widmann arichí da plü cultures y rujenedes él gnü festejé dales comunités linguistiches presëntes tl Südtirol le De internazional dl’UNESCO.
Le De internazional dl Lingaz dla Uma, protlamé dal’UNESCO por promöie la diversité linguistica y culturala y le plurilinguism, vëgn festejé vigni ann ai 21 de forá. Le fin é chël da recordé l’importanza dla rujeneda dla uma sciöche bëgn cultural y linguistich. Le slogan por le 2017 é "Towards Sustainable Futures through Multilingual Education", cun chël che l’UNESCO ó sotligné l’importanza dla formaziun plurilinguala por n svilup sostenibl.
I trëi assessurs por la cultura, Christian Tommasini, Florian Mussner y Philipp Achammer, á daurí en chësta gaujiun l’evënt organisé dai trëi Departemënc Cultura dl Provinzia tl palaz Widmann a Balsan. L’obietif dla scomenciadia é chël da sotligné da diversité linguistica presënta te Südtirol y de so valur ajuntif sotlignan dantadöt l’importanza dles conescënzes linguistiches por favorí l’integraziun soziala y culturala.
„I sun düc a ciasa tla ciasa de düc“, cun chëstes parores ti á l’assessur Christian Tommasini dé le begnodü á düc i partezipanc y al á orü sotligné le fat che la scomenciadia é gnüda organisada tl Palaz Widmann, le post de rapresentanza prinzipal dla Provinzia y dl Südtirol. „Le Südtirol é na tera cun raisc sterscies y che se deura al monn por svilupé adöm ai zitadins nüs, na sozieté nöia. N Südtirol che rajona de plü lingac y le raiun che i orun“, insciö Tommasini. L’assessur por la cultura ladina Florian Mussner á sotligné por l’ocajiun l’importanza dla rujeneda dla uma che é insostituibla, n patrimone personal, y che cun la sconanza dla rujeneda dal uma vëgnel ince mantigní n aspet fondamental dl’identité culturala. „Na buna conescënza dla rujeneda dla uma é ince la condiziun por ti jí adincuntra a d’atres cultures cun confidënza y otimism“, á dit l’assessur ladin cun l’invit ai presënc da imparé ince da conësce le ladin, y da odëi le barat cultural sciöche na richëza y da aprijé la diversité culturala. L’assessur por la cultura todëscia Philipp Achammer á recordé che tröpes cultures á ciafé na patria tl Südtirol sotlignan l’importanza da lauré por na pluralité dles cultures respetan vignöna. „Avëi cosciënza de se instësc ó dí ester daverc tl confrunt di atri. I zitadins nüs mëss conësce sües raisc y ester daverc ala realté locala“, insciö Achammer.
Do le salüt da pert di assessurs á spo la presidënta dl VKE, Fernanda Mattedi adöm cun Sonja Logiudice dl Ofize Formaziun permanënta y Laura Sedda (VKE) fat n referat sön le conzet de lingaz dla uma. Fatima Giafari y Gianluca Battistel á spo cunté de sües esperiënzes peronsal sön l'imparé n lingaz nü. De plü rapresentanc di grups linguistics desvalis á spo organisé na sort de „bazar“ cun n barat spontan de idees, cultures, boandes y mangiaries tradizionales. I trëi Departemënc dla Provinzia á ince anuzé l’ocajiun por presenté les poscibilités desvalies da imparé i lingac ofiziai dla Provinzia tres cursc, libri y ater material d’ütl.
usp
Galaria dales fotografies
