Atualità
Istitut Ladin Micurá de Rü: Erika Castlunger é la presidënta nöia
Le Consëi d’aministraziun dl Istitut Ladin Micurá de Rü á tigní dan da püch la pröma incuntada, do che la Junta provinziala á nominé i mëmbri nüs.
La pröma incuntada dl Consëi d’aministraziun nü dl Istitut Ladin Micurá de Rü é gnüda tignida ai 19 d’aurí tla sënta dl Istitut te Sëlva. I mëmbri che fej pert dl Consëi nü é gnüs nominá dala Junta provinziala, aladô dla proposta dl assessur provinzial por la scora y la cultura, Florian Mussner. Te Consëi él insciö rové ite Erika Castlunger sciöche rapresentanta dla Junta provinziala, Roland Demetz de Sëlva por i comuns de Gherdëna y dla Val Badia y Heinrich Videsott da San Martin sciöche rapresentant dla Consulta scolastica provinziala – seziun ladina.
Chësc vare á messü gní fat aladô dl decret statal che vëiga danfora na reduziun di mëmbri di organs aministratifs y de control dles istituziuns y corporaziuns publiches, che pó ma plü avëi da un cina n mascim de cin’ mëmbri.
Le Consëi d’aministraziun á le dovëi d’aprové le program d’ativité anual, le bilanz de previjiun y le cunt consuntif, y da chirí fora i proiec che dess avëi la priorité. Le Consëi lita so presidënt, nominëia la Comisciun culturala odüda dant dal Statut y pó fá propostes da mudé le Statut dl Istitut.
En ocajiun dl’incuntada di 19 d’aurí á le Consëi lité Erika Castlunger sciöche presidënta dl Istitut Ladin y Roland Demetz sciöche vizepresidënt. Canch’al sará la proscima sentada, gnarál ince nominé la Comisciun culturala.
La nomina vel por trëi agn. Öna dles novités é ince chëra che le Consëi d’aministraziun ne pó nia mantigní l’inciaria por plü co trëi mandac indolater.
USP
