Atualità
Nominá i comëmbri dl Consëi de direziun por les scolines ladines
La Junta provinziala á nominé ai 27 de forá les 5 comëmbres y 1 en comëmber dl Consëi de direziun nü por les scolines ladines.
Indöt á la Junta provinziala nominé 6 comëmbri por le Consëi de direziun por les scolines ladines. Dui é i comëmbri nominá sciöche rapresentanc di Comuns sön proposta dles Comunités comprensoriales: al se trata de Adelheid Lara Moroder (Comun de Urtijëi) y de Giorgio Costabiei (Comun de S. Martin). Por ci che reverda espertes tl ciamp dl’educaziun él gnü chirí fora Carla Comploj (ispeturia por l’integraziun), Ulrike Veronika Piccolruaz (doturia pediatra), Edith Ploner (ispeturia por les scolines ladines y pedagoga) y Martina Comploi (pedagoga soziala). La dorada dl'inciaria dl Consëi nü é de trë agn, cina le 2020. Les inciaries prinzipales dl Consëi é chëres de dé jö arac y fá propostes sön l’organisaziun dles scolines y sön le laur pedagogich.
Indöt fejel pert dl Consëi de direziun 18 comëmbri, a pert i sis nominá dala Junta fejel ciamó pert dl Consëi cater maestres (Alexandra Insam, Rosmarie Senoner, Maria Valentin y Barbara Ties), trëi colaboradësses pedagogiches (Anneliese Ellecosta, Judith Comploj y Irma Frenes) y cater rapresentanc di geniturs (Patrick Stuflesser, Simon Peter Moroder, Anita Vittur y Tanja Pallestrong), litá dales 3 categories. La direturia Hannelore Insam fej pert de dërt y é a ce dl Consëi.
USP
