Atualità
Scora mesana y alta: Novités por i ejams de conclujiun
I Ejams de Stat dla scora alta y mesana é gnüs adatá ciamó deplü ales esigënzes di sistems scolastics dl Südtirol.
La Junta Provinziala á aprové incö ai 6 de merz 2018 sön proposta di assessurs por la scora Christian Tommasini, Florian Mussner y Philipp Achammer n regolamënt d’esecuziun nü por ci che reverda i Ejams de conclujiun dla scora mesana y alta. “Cun chësta regolamentaziun nöia vëgnel tut en conscidraziun ciamó deplü les carateristiches spezifiches de nosc sistem scolastich, dantadöt por ci che reverda le plurilinguism, mo ince por ci che reverda les particolarités dla scora paritetica de nostes valades ladines”, spliga l’assessur por la scora ladina Florian Mussner.
Les mudaziuns por ci che reverda la scora mesana dess bele gní atuades tl ann de scora 2017/18. Na novité é che les proes INVALSI, ne fajará nia plü pert dl ejam de conclujiun, mo gnará fates denant y sará na condiziun por podëi tó pert al ejam. L’ejam instëss ará cinch proes scrites che reverda les materies todësch, talian, ladin, inglesc y le setur dla matematica y logica. Implü él ciamó preodü n ejam a usc. Tratan l’ejam messará les scolares y i scolars desmostré de avëi arjunt les competënzes odüdes dant dales Indicaziuns Provinziales por les scores mesanes ladines. N focus particolar ti gnarál dé ales competënzes linguistiches, che gnará ejaminades sides tl scrit co ince tla proa a usc. I criters de valutaziun gnará stabilis dala comisciun d’ejam en acordanza cun les diretives dl Departimënt Educaziun y Cultura Ladina.
Tl ann de scora 2018/19 jarál spo ince en forza les mudaziuns en cunt l’Ejam de Stat dla scora alta y che reverda dantadöt la spartiziun di punc. Insciö podará les candidates y i candidac ciafé por le percurs scolastich cina la matura indöt 40 punc sön 100. Por la pröma proa scrita (che tles scores ladines pó gní fata por talian o todësch) vëgnel dé 15 punc, sciöche ince por la secunda proa che reverda na materia spezifica. La terza proa scrita valutará les competënzes dla candidata /dla candidat tl lingaz che ara/al ne á nia chirí fora tla pröma proa; al podará gní dé cina 10 punc. Tla proa a usc gnará ince adoré le lingaz ladin; por la valutaziun de chësta proa ará la comisciun a desposiziun 20 punc.
Tres le regolamënt nü él ince gnü definí plü avisa i contignüs d’ejam por ci che reverda les scores profescionales.
USP
