Atualità
Fin dl ann de scora por 89.000 scolars y scolares
Indoman, vëndres ai 15 de jügn se röia l’ann scolastich por les scores elementares, mesanes, altes y profescionales. Ince por les scolines se stlüj jö l’ann.
Tles scolines y scores dles valades ladines s‘âl scrit itetartan l’ann scolastich 2017/18 indöt 3178 mitans y mituns. Por ci che reverda les scolines ladines él sté 684 mitans y mituns che á frecuenté öna dles 17 scolines dles valades ladines. Tles 15 scores elementares dles valades ladines él sté indöt 1195 scolars y scolares che s’â scrit ite tl ann scolastich 2017/18, por ci che reverda les scores mesanes é le numer de iscriziuns sté 751. Indöt á 381 scolars y scolares fat öna dles cater scores altes o la scora profescionala „Cademia“.
Le numer di scolars ametüs al ejam final dles scores mesanes é de 215 sön indöt 220 scolars scric ite te terza mesana. Por ci che reverda les scores altes é düc i 101 scolars ametüs al ejam de Stat de conlujiun dl percurs scolastich dla scora alta.
Por l’intendënt dles scores ladines Roland Verra él ince sté meso tl ann de scora 2017/18 da porté a piz na seria de sfidades che reverda por ejëmpl la promoziun dla continuité didatica dales scolines ales scores altes, le scomenciamënt dla reorganisaziun dl sistem de formaziun ladin y la regolamentaziun nöia di ejams de Stat dles scores mesanes cun na proa scrita de inglesc. “Implü unse ince metü la basa por n apalt important che reverda l’informatica, olache al dess gní renové le software y le hardware te chësc setur. Na priorité importanta por le sistem de formaziun ladin é ince la promoziun dles materies scientifiches y matematiches tl contest dles materies scolastiches MINT”, á dit Verra. L’Intendënt rengraziëia dötes les colaboradësses y düc i colaboradus dl sistem formatif ladin por le gran impëgn desmostré tresfora a bëgn dles scolares y di scolars dles valades ladines. Les persones che laora tles scolines y tles scores á pité a nostes jones y a nüsc jogn n bun acompagnamënt te so svilup personal, formatif y cultural. Al ti aoda a döt le personal de scora y scolina y ales scolares y ai scolars de beles vacanzes da d’isté.
Tles scores elementares, mesanes y altes todësces él l’ann scolastich che se röia indoman por 45.375 scolars y scolares. Tles scores profescionales él indöt 8615 che röia l’ann scolastich, indere por les scores de musiga ladines y todësces é le numer de 16.825 scolars. 12.635 mitans y mituns é jüs a scolina todëscia tratan l’ann de scolina 2017/18. 17.000 scolars y scolares é jüs a na scolina o na scora taliana.
Indöt ametüs al ejam final dles scores mesanes todësces él 4095 scolars , por ci che reverda l’ejam de Stat dla scora alta él indöt 2420 scolars ametüs, 400 tles scores profescionales. Tles scores talianes él indöt 1300 studënc che fej l’ejam de stat de terza mesana y 1000 che é gnüs ametüs al ejam de Stat de secundo livel.
La cualificaziun dl personal didatich, le renforzamënt dles competënzes dla vita por i scolars y les scolares sciöche ince la promoziun di rendimënc scolastics é stades les tematiches zentrales por le diretur dla formaziun todëscia Gustav Tschenett. “Iniann él ince gnü stabilí les condiziuns por la formaziun di insegnanc dla Université da Balsan, implü unse metü en pe na formaziun por i insegnanc d’integraziun por les scores altes y mesanes”, insciö Tschenett.
L’intendënta dles scores talianes, Nicoletta Minnei, recorda che al é gnü arjunt de plü obietifs, danterater le scomenciamënt de dui percursc de cater agn por la scora alta y la promoziun dl plurilinguism, dla legalité y de scomenciadies cuntra le cyber-bulism.
USP
