Atualità
Cursc de ladin a Balsan descëda gran interes
D’otober dl 2017 él sté passa 100 partezipanc che s’á scrit ite por fá n curs de ladin - Cursc por prinzipianc y progredis
Arichimënt personal, imparé da conësce la cultura ladina y se dé jö cun n lingaz nü – chëstes é danter l’ater les motivaziuns di partezipanc y dles partezipantes ai cursc de ladin a Balsan. I cursc vëgn organisá dal Departimënt Educaziun y Cultura ladina a Balsan , en colaboraziun cun le Comun de Balsan y á descedé dër n gran interes pro i todësc y i talians, tan che al é bele sté dl 2017 indöt 100 che á orü se scrí ite a n curs de ladin. “L’organisaziun de cursc por ladin aldinfora dla Ladinia é dër important por ti pité ai interessá da imparé da conësce damí la cultura ladina y nostes rujenedes. Che l’interés é tan gran nes fej n gran plajëi y desmostra le gran interes por nosc grup linguistich”, dij l’assessur por la scora y cultura Florian Mussner.
“Deache al ne ê nia poscibl da organisé tan de cursc te un n iade unse messü partí sö i interessá te de plü spanes de tëmp, rovan al isté dl 2018”, á dit la reladëssa di cursc Daria Valentin. L’interes di todësc y talians por imparé da conësce le ladin é dër gran y chësc nes fej plajëi, dij Valentin. “Un o l’ater á ince dit fora tler che al ti desplej che ai ne á mai albü denant la poscibilité da l’imparé te scora y fajess ion la proposta da porté ite, ince ma sciöche ores facoltatives, cursc de ladin bele dales scores elementares inant, sides cheres todësces co chëres talianes”, insciö Daria Valentin.
7 cursc indöt
De otober dl 2017 él sté feter 100 porsones che se á scrit ite y che è spo gnüs partis sö te de plü cursc da n mascim 20 partezipanc a un n curs. Un é gnü tigní atira y é jü dai 11 de otober ai 05 de dezember dl 2017. Lapró él gnü tigní tla medema spana de tëmp ince n curs por progredis. Les atres porsones é gnüdes spostades a chësc invern dai 10 de jená ai 28 de forá, olache al é gnü organisé trëi cursc. En mercui ai 13 de jügn s’ál spo stlüt jö dui cursc por progredis, cun partezipanc che á tut pert ai 4 cursc por prinzipianc de chësc altonn/invern.
I contignüs di cursc
“Por ci che reverda i contignüs ái fat dal curs por prinzipianc na picia introduziun al lingaz, chël ó dí che an impara le lessich de basa che á da nen fá cun la porsona, cun le guant, la spëisa, i tiers, i corusc, les sajuns y n valgönes püces informaziuns gramaticales, sciöche la formaziun dl plural, la formaziun dl feminin y i verbs de basa tl presënt”, spliga Daria Valentin.
Le curs por prinzipianc se basëia scialdi döt sön eserzizi scric, olache i partezipanc á la poscibilité da memorisé les parores. Al vëgn sambëgn ince baié, mo al vëgn ma fat frases scëmples, sciöche “co aste pa inom?”, da olá vëgneste pa? Tan de agn aste pa? y i.i.
Dal curs por progredis é le focus sön la conversaziun, chël ó dí che i partezipanc y les partezipantes impara da ciacolé deboriada. Pian ia da n argomënt general che pó ester les vacanzes, la ciasa, la vita de familia y i.i. impara les partezipantes y i partezipanc da se damané fora y da respogne.
I proscims cursc gnará bonamënter organisá da d’altonn dl 2018 en colaboraziun cun la Consulta ladina dl Comun da Balsan. Por informaziuns plü monüdes prëibel contaté Daria Valentin (Daria.Valentin@provinz.bz.it).
USP
Galaria dales fotografies
