Atualità
Scolines y scores: La Junta stabilësc les regoles por da d’altonn
Insegnamënt en presënza, dantadöt te scores elementares y mesanes, pici grups che nes se müda nia, orars desvalis, flessibilité pro les pauses – insciö dess l’ann de scora 2020/21 pié ia.
Sciöche l’ann de scolina y de scora 2020/21 tl Südtirol dess mët man y cun ci regoles nöies: chësta tematica é stada tl zënter dla sentada dla Junta provinziala da incö ai 9 de jügn. Sön proposta di assessurs Daniel Alfreider, Philipp Achammer y Giuliano Vettorato él gnü definí les regoles por l’ann de scora nü che é gnüdes elaborades dales trëi Direziuns scolastiches adöm al’Aziënda sanitara. Ares fej referimënt ales regoles statales aprovades dal Parlamënt dan da püch.
De plü contac tles scores y segurëza por les families
“Les families, scolares y scolars á albü na seria de restriziuns dër stersces provia dl’emergënza sanitara. Al é important da garantí l’insegnamënt en presënza por da d’altonn garantin dötes les mosöres de sigurté. I laorun adöm al monn dla scora por pité indo prospetives y segurëza a families y de plü contac soziai danter les scolares y scolars”, dij l’assessur Alfreider. Al vëgn dötaurela ince planifiché i sorvisc sciöche le trasport y la poscibilité dla mensa.
L’assessur por la scora todëscia Achammer sotlignëia che al é fondamental da arjigné ca l’insegnamënt scolastich en presënza por dötes les scolares y i scolars, dantadöt ince deache la scora é n sostëgn fondamental por l’educaziun dles mitans y di mituns. “L’ann de scora 2020/21 gnará organisé cun tl zënter la sigurtéd dla sanité”, á dit l’assessur por la scora taliana Vettorato che sotlignëia che an oress ti dé zoruch ales mitans y ai mituns situaziuns de normalité.
Garantí la presënza plü ampla poscibla
Sön chësta basa á la Junta provinziala definí incö desposiziuns por la sconanza dla sanité y l’organisaziun dl’istruziun por l’ann de scora 2020/21. Aladô dla dezijiun da incö dla Junta dessel gní garantí dantadöt por i mituns plü pici na presënza tles strotöres scolastiches. Tles scolines dessel gní fat grups che resta tres i medemi. Sce y tan inant che ara jará da pité n sorvisc arlungé, ne sán nia ciamó. Tles scores elementares y mesanes é preodüda la didatica cun presënza vigni de. Sce al sará debojëgn, gnará formades tlasses implü, por podëi garantí la destanza de segurëza. La presënza te tlassa sará ma danmisde.
Por les scores altes él preodü da baraté jö danter presënza te tlassa y didatica a destanza, tles situaziuns che ara ne vá nia da avëi a desposiziun le numer dles tlasses nezesciares y les capazités de trasport scolastich. Por scolars cun debojëgns particolars o por chi che adora n sostëgn particolar pol gní odü dant ince la presënza vigni de.
“En sostanza oressun cherié modei didatics aposta y lapró mëte sö na preparaziun didatica strotorada y digitalisada, insciö da ester bele arjigná ca cun strotöres de comunicaziun y ofertes didatiches tla eventualité tl caje che an messass indô jí te n’isolaziun a ciasa”, á dit i assessurs Alfreider, Achammer y Vettorato.
Degöna adoranza de mascheroc sce al é garantida la destanza de segurëza
La Junta á ince stabilí da tó demez l'adoranza de mascheroc sce la destanza de segurëza é de almanco un n meter. Les atres mosöres por la sconanza dla sanité che é gnüdes dades pro incö dala Junta é l’adatamënt di orars de mëte man y de fin dles scolines y dles scores. Ince les pauses dess gní fates con plü flessibilité. I posć tles menses gnará smendris, mo tl medemo momënt ó la Junta tó provedimënc de sostëgn por les families.
I grups che resta tres i medemi, la flessibilité di orars de entrada y de fin dla scora y dles pauses é, adöm cun la destanza de segurëza danter porsones de n meter cun mascherot, dala scora elementara inant, y de dui metri zënza mascherot, les regoles de basa por la prevenziun dla defujiun dl virus, che mëss sambëgn gní integrades cun mosöres d’igiena (dejinfeté les mans, puzené gonot y a funz, daurí sö gonot les finestres).
USP/jw
