Atualità
Proes de contlujiun por prësc 10.000 scolares y scolars dl Südtirol
Condiziuns particolares por 4132 scolares y scolars che metará man da indoman (17/06) cun les proes di Ejams de Stat dles scores altes y profescionales. Tles scores mesanes á les proes bele metü man.
Al é indöt 9.955 scolares y scolares de dötes les scores südtirolejes di trëi grups de lingaz che é drio o che metará tosc man da fá les proes de contlujiun de n livel scolastich. Indöt 373 tles scores ladines, 6.946 tles scores todësces y 2.636 tles scores talianes.
Scores altes ladines: 101 candidates y candidac
Indoman, mercui ai 17 de ma, metará man l’Ejam de Stat por 4132 scolares y scolars te döt le Südtirol. Por ci che reverda les scores altes ladines él dötadöm scrit ite atualmënter 101 scolares y scolars tla cuinta tlassa dles scores altes tles valades ladines, de chisc 23 scric ite tl Lizeum d’Ert Cademia, 43 tl ITE da Urtijëi y 20 a La Ila y 14 scolars fej atualmënter la cuinta tlassa di Lizeums a La Ila. Tla scora profescionala por l’artejanat artistich da Urtijëi tolará un n scolar pert al ejam de Stat.
2349 scolares y scolars dles scores altes todësces y 432 dles scores profescionales metará indoman man cun l’Ejam de Stat, por ci che reverda le scores altes y profescionales talianes é le numer de 1250 scolares y scolars.
Majer pëis ai ultimi trëi agn de stüde dla scora alta
Porvia dla emergënza coronavirus sará la valutaziun dl Ejam de Stat completamënter nöia. L’emergënza á mudé completamënter les modalités dl ejame che resta n passaje fondamental dla vita scolastica de vigni studënt: n ejam che reverda dötes les materies respetan le percus che vigni maturant/a á porté inant ti 13 agn de scora. L’Ejam de Stat gnará tigní por zirca n ora da sies rapresentantes o rapresentanc dl Consëi de classa cun la scolara o le scolar; dla comisciun fajará pert na presidënta o n presidënt che vëgn da defora. La proa a usc reverda de plü materies che an podará colié öna cun l’atra. Por la valutaziun dl ejame podará la comisciun dé indöt 100 punc. Por l percurs scolastich individual di ultimi trëi agn de scora lata ciafará la studëntes/i studënc indöt 60 punc: dejdot por la terza classa, vint por la cuarta classa y vintedui pro la cuinta classa. Cun i atri 40 punc gnarál valuté la proa a usc tratan l’ejame.
Co vëgn pa fat l’ejame?
La proa a usc metará man cun la discusciun de n laur scrit arjigné ca dal studënt sön les materies spezifiches dla scora y jará inant cun la interpretaziun de n test de leteratöra taliana y todëscia. Spo messará la candidata/le candidat se dé jö cun na vjiun interdisziplinara cun materiai dac dant dala comisciun. Dla proa a usc fejel ince pert na relaziun dla candidata/dl candidat sön sües esperiënzes de practicum intratan l’ann dla scora alta y na discusciun sön i temesc liá ala zitadinanza.
Proes tles scores mesanes
Por ci che reverda 272 scolares y scolars dla terza classa dles scores mesanes ladines á les proes de contlujiun bele metü man o metará man ti proscims dis. Tles scores mesanes todësces é le numer de 4165 scolares y scolars, por ci che reverda les scores mesanes talianes él ametüdes y ametüs indöt 1377 scolares y scolars. La proa de contlujiun gnará efetuada inann porvia dl’emergënza coronavirus tres na presentaziun online.
USP/ASP
