Atualità
Sentada dles trëi consultes dla jonëza: Europa tl zënter
Les Consultes provinziales dla jonëza ladina, todëscia y taliana s’á incunté por l’ultima sentada de chësta legislatöra tl Istitut ladin “Micurà de Rü” a San Martin de Tor.
Ai 5 de setëmber dl 2020 s’á les Consultes provinziales dla jonëza ladina, todëscia y taliana incunté por la sentada da vigni ann che tol ite düc i trëi grups linguistics, tl Istitut ladin Micurà de Rü a San Martin de Tor. Pro süa ultima sentada s’á les consultes dé jö cun le tema „proiec de solidarieté europeics“. La referënta y colaboradëssa dla Provinzia de Balsan tla sënta a Bruxelles, Giulia Chiarel, á acompagné döt le de les Consultes provinziales dla jonëza.
Danmisdé él sté sön le program l'introduziun tla realisaziun de proiec de solidarieté europeics cun le “lëgn di problems” tres la referënta Giulia Chiarel - coliamënt ai punc zentrai tratá bele tles sentades online di 13.07.2020 y 24.08.2020.
Domisdé él sté sön le program da scrí sö n proiet concret cun les metodes dades dant dal’Uniun europeica sön le tema „Co ciaron pa che la generaziun plü vedla ne vëgnes nia stlüta fora dala sozieté tecnologica“. Do n de de laur intensif á les rapresentantes dles trëi Consultes provinziales dla jonëza: Lena Mulser por le grup linguistich ladin, Verena Mittelberger por le grup linguistich todësch y Adelina Perlaska por le grup linguistich talian, porté dant ai assessurs provinziai por le Sorvisc por la jonëza ladin y talian le proiet de solidarieté europeich lauré fora cun les indicaziuns de Giulia Chiarel.
Al é gnü a se le dé n barat produtif y interessant danter i assessurs y che che á tut pert. Ajache al se trata dl’ultima sentada deboriada de chësta legislatöra, él gnü ciaré zoruch ai ultimi 3 agn de laur; al é gnü sotrissé l’importanza dl barat danter jonëza y politica, sciöche ince le dejider da intensifiché l’ativité de consulënza dles Consultes provinziales dla jonëza. L’assessur provinzial por le Sorvisc por la jonëza ladina á alzé fora l’importanza y le valur dl coliamënt europeich y á nominé sciöche ejëmpl le barat bele autorisé danter les scolines de Urtijëi y dla Svezia (proiet UE PLANE) y l’assessur provinzial por le Sorvisc por la jonëza talian á baié dla sostignibilité.
Ara é jüda da mëte adöm les ajëndes di dui assessurs provinziai por ejëmpl tres le proiet da adoré idrogen sciöche acumuladú de energia y spo da l’anuzé sciöche ciarburant por i veicui. Chësc fej a na moda che ara vais da acumulé la forza eletrica fata de nöt te nüsc implanc idroeletrics y l’adoré da fá idrogen, che pó spo gní trasformé indô te energia da vigni ora dl de.
USP/USP
