Atualità
N var inant per lauré plu saurì cun l gherdëina
ast - L svilup dla rujeneda ladina tl idiom de Gherdëina à nsnuet, mierculdi 17 de dezëmber, arjont n auter var mpurtant. Cun l CD nuef dl vocabuler tudësch-ladin de Gherdëina se lascel lauré plu saurì cun nosta rujeneda dl’oma. La forma digitela dl vocabuler de Marco Forni pieta, dantaldut per chëi che uël mparé l ladin, nce de pudëi audì la drëta pronunzia dla paroles. L Istitut Culturel Ladin Micurà de Rü à nsuet presentà l strumënt neuf tla scolina de Urtijëi cun na performance drët tucheda.
Permez al Vocabuler tla forma stampeda à Marco Forni y si team mo laurà inant nsci che n à pudù junté mo d’autra paroles. Sun la CD nueva iel da abinè 21.000 esprescions tudësces che corespuënd a 67.000 paroles dl ladin-gherdëina. La nuvità ie che 500 paroles ie nce da scuté su per pudëi audì la drëta pronunzia. Per les ntënder mo miec iel nchinamei unì juntà vel fotografia. L presidënt dl Istitut Culturel Ladin Micurà de Rü, Hugo Valentin à sorissà che uni lingaz à debujën de n svilup per pudëi tenì pea cun i tëmps. Tl cajo dl ladin à permò messé ruvé la persones che sà da svilupé la rujeneda y sën an bele pudù dé ora n strumënt nuef, n strumënt che ie n suport modern, nsci Valentin. La CD mostra su la carateristiches damandes dai sitemes de computer Pc y nce per Macintosh. N possa crì la paroles muan sibe dal tudësch, che nce dal gherdëina, cossa che ne fova mo nia mesun tla forma dl liber. Lauran ora chësta CD an ulù tenì cont dla paroles che à da nfé cun l viver da uni di, paroles nueves che se à nravisà ite ti ani, manieres de dì y fraseologies. Mplù ie nce da abinè nfurmazions de gramatica y ortografia. N recunescimënt per chëi che se à dat ju bele da 7 ani cun chësc proiet che ie stata la cumpëida de jënt y rapresentanc de istituzions unic ala presentazion a Urtijëi. Ti ultimi doi ani iel uni fat sibe l vocabuler per l gherdëina che l ladin badiot, de chisc libri nen iel bën 3.000 danter la jënt, n suzes nia aspità dal diretëur Leander Moroder. „Chësc dà nce motivazion per ji inant“. Per l daunì nfati iel programà de mëter na forma de vocabuler tl internet ulache la jënt possa pona dé ite si prupostes per esprescions nueves. Chëstes possa pona, aldò dla praorles de Leander Moroder, nce unì valutedes online da duc i nteressei. Marco Forni y si culaburadëures à ntant bele metù man de lauré sun n vocabuler talian-gherdëina, pra chël che n possa se nuzé dla basa dl vocabuler tudësch-ladin. Per l 12 de merz unirà la CD nueva prejenteda mo n iede tl’Academia dei Lincei a Roma, na istituzion scentifica da mascim livel cun professëures de inuem schiche Walter Belardi y Tulio Delauro. Nteressei giapa da cumprè la CD dl vocabuler tudësch – ladin gherdëina tla sëntes dl Istitut Culturel Ladin Micurà de Rü, tla budëighes dai libri dla valeda y nchinamei tla majera butëighes a Bulsan. L priesc ie de 16,00 Euro.OSP
