Atualità
Coronavirus: Referat de Gänsbacher organisé dal’Intendënza ladina
Por ciafé informaziuns diretamënter dai esperc spezialisá dl setur él sté l’Intendënza ladina che á organisé n webinar cun l’imunologh Bernd Gänsbacher.
Dé inant informaziuns da pert de n espert spezialisé tl setur é sté le fin prinzipal de n webinar cun l’imunologh prof. dr. Bernd Gänsbacher organisé dal’Intendënza ladina en mercui ai 24 de forá dl 2021. La scomenciadia de aprofondimënt scientifich dal titul “La storia y i problems liá al Covid-19” é stada ponsada por direturies, personal pedagogich y insegnant dles scolines y dles scores, i referënc y les referëntes Covid, rapresentanc y rapresentantes di geniturs y de studëntes y studënc y geniturs interessá.
Informaziuns da fontanes sigüdes
L’assessur por la scora y cultura ladina Daniel Alfreider á sotligné por l’ocajiun l’importanza da s’informé da fontanes sigüdes. “Al ne é nia n tëmp saurí cun dificoltés sides por la scora y jonëza, mo ince por l’economia y por la sozieté en general. Nosta intenziun é chëra da garantí le plü che ara vá l’insegnamënt en presënza tres tignin en conscidraziun la situaziun atuala. Chësc webinar é dessigü n vare important por avëi na fondamënta scientifica da ciafé soluziuns”, á sotligné Alfreider. N vantaje dla scora ladina é por l’assessur che tles valades ladines él scolines y scores te vigni paisc che dëida da tó mosöres spezifiches da paisc a paisc, insciö Alfreider.
L’Intendënta Edith Ploner á recordé che le fin dl webinar é da dé inant informaziuns scientifiches sön les chestiuns che reverda le Covid-19. “Na tematica dles ultimes edemes é stada chëra dles variores por le personal scolastich y sëgn sará chël di tesc’ tles scores. Al é le compit de nos dötes y düc da lauré deboriada por ciafé y azeté soluziuns che mëtes tl zënter la responsabilité y la solidarieté por stravardé nosta sanité”, á dit l’Intendënta.
Importanza dla medejina y dla sciënza por scombaté le virus
Te so referat á spo l’imunologh Gänsbacher analisé de plü tematiches che reverda la defujiun dl coronavirus y sües conseguënzes por le corp uman. “Un di problems prinzipai de chësc coronavirus nü é che le virus pó gní dé inant bele dui dis denant che al vëgnes fora i pröms sintoms pro la porsona. Tröpes porsones infetades ne le sá nia y infetëia inciö d’atres porsones”, á dit Gänsbacher. Da merz dl 2020, canche ciamó 20 porcënt dles porsones infetades messâ jí te ospedal, sunse rová al 3 porcënt da sëgn, aladô de Gänsbacher, ince por mirit dles mosöres de sigurté sciöche la diminuziun de contac, le tigní les destanzes y se vistí la maschera. “Implü él ince la sciënza y la medejina che á ciafé formes de assistënza sanitara nöies por diminuí i caji cun n decurs pesoch”, dij l’espert.
Gänsbacher á spo splighé le funzionamënt y i efec dla variora sön le corp uman y sön le sistem imunitar. “Do la variora él le corp che á spo anticorps che eliminëia le virus te n per de ores canche an vëgn infetá. Dötaurela él bele gnü fat la variora a 213 miliuns de porsones che desmostrëia la gran validité dla prozedöra”, á dit Gänsbacher che á spo ince splighé le percurs de aprovaziun di serums desfarënc de Pfizer-Biontech, Moderna y AstraZeneca. L’imunologh á spo ince analisé la tematica dles mutaziuns dl coronavirus nü.
La moderaziun é stada de Emanuel Gravino, colaboradú dl referat por la promoziun dla sanité tl Zënter de competënza inclujiun y consulënza tla Intendënza ladina.
Por ti ciaré al referat de Gänsbacher pon cliché chiló: https://www.youtube.com/watch?v=RSuCBdFcfTc&t=360s
USP/rc
