Atualità
Scora ladina: Tesć nasai fondamentai por scora en presënza y sanité
Por garantí la scora en presënza él fondamental da jí inant cun le monitoraje cun le test nasal. Fondamentala la colaboraziun danter geniturs y scores.
Les scores elementares y mesanes ladines sará dai 7 d’aurí inant al 100 porcënt en presënza. Les scores altes al 75 porcënt. Chësc sará poscibl giulan a n monitoraje cun le test nasal.
Alado dl assessur por la scora ladina Daniel Alfreider y l'intendënta ladina Edith Ploner él i mituns y mitans, jogn y jones che á le dërt da imparé, sciöche ince n dërt ala sconanza de süa sanité. Entrami chisc dërc é da porté inant adöm. Deache n valgügn geniturs á dit de avëi dübi sura le test nasal él l'assessur Alfreider y l'intendënta Ploner che sotrissëia i obietifs di tesć: "Nosc obietif é da porté inant le plü poscibl la didatica en presënza cina ala fin dl ann de scora. Chësc podunse garantí fajon sovënz le test nasal asvelt. Al é saurí da fá, nia prigorus y fidabl.Giulan a chisc tesć, vara da ciafé fora adora assá infeziuns Covid asintomatiches."
Lapró vél che cun un n caje positif pó la classa sté inant en presënza cun tesć fac do regolarmënter, cun deplü caji positifs pó l’autorité sanitara mëte la classa en carantena. Classes singules vá en carantena a na moda che les atres classes pois fá inant en presënza.
L'Intendënza ladina informëia che chi co resultëia positif, vëgn porté cun discreziun te na lerch sconada y al vëgn contaté i geniturs. Chësta é la medema prozedöra co vëgn a se le dé tl caje de scolars y scolares co mostra sö sintoms te classa.
Chi co ne ó nia tó pert ai tesć nasai, pó s’anuzé dl dërt dl imparé tres la didatica a destanza tres inciaries. Al ne pudarà nia gní trasmetüdes online les leziuns en presenza a chi che é a ciasa.
Le test nasal é scëmpl. Por deplü informaziun podëis cliché chiló.
"I Ves periun dër bel do Osta crëta y do Osta colaboraziun. Anuzesse dl test nasal: plü che i testun y manco caji che i sarun bugn da i isolé y limité la difujiun. Deboriada, sce vignun y vignüna fej sia pert, podunse fá poscibl sides la didatica en presënza co le contat cun la comunité scolastica", stlüj jö i responsabls dla scora ladina.
USP/rc
