Atualità
De dla Scora Ladina: Scora en presënza y digitalisaziun
Tl zënter dl De dla Scora ladina él sté le mëteman dl ann de scora tl tëmp dl coronavirus. Azënc prinzipai sön l’insegnamënt en presënza y la digitalisaziun sciöche oferta ajuntiva.
L’imparé te na forma digitala y i svilups dla didatica por le dagní é stá tl zënter dl De dla Scora Ladina 2021 incö ai 31 de agost sön MS-Teams. Al De dla Scora Ladina ál ince tut pert l’assessur por la scora y cultura ladina Daniel Alfreider y l’intendënta scolastica Edith Ploner.
Digitalisaziun, scora en presënza, competënzes soziales y svilup dl mparé ince cun mesi digitai: le focus dla scora ladina
L’assessur Alfreider á sotligné l‘importanza sön la formaziun spezifica por le monn dla scora ladina. “Ince te chësta perioda dl coronavirus él fondamental da investí sön la formaziun de vigni singula porsona y sön la responsabilité coletiva por garantí le svilup de nosta comunité ladina”, insciö Alfreider. Le rode dles insegnantes y di insegnanc é te chësc vers de gran valüta. “Al é nosc obietif da lauré sön la digitalisaziun, nia siöche alternativa ala scora en presënza mo sciöche oferta ajuntiva, ince por ti jí adicuntra ai debojëgns de döes les scolares y scolars”, insciö Alfreider.
L’intendënta Edith Ploner á sotligné che le fin de inann é da garantí l’insegnamënt en presënza le plü che ara vá. Al sará nezesciar por le personal insegnant da avëi le pass vërd. Por ci che reverda la strategia di tesc gnarál ciamó mené inant informaziuns y zircolares. “I punc zentrai por inann é renforzé le plurilinguism, le imparé autonom y le imparé cun i media nüs, renforzé les competënzes soziales y formac nüs tla formaziun de insegnantes y insegnanc”, insciö Ploner.
Pireddu: L’interaziun digitala sará tres plü importanta tla didatica
La pert zentrala dl De dla Scora ladina 2021, é sté inann le referat dl espert Mario Pireddu, professur assozié dl’Université dla Tuscia, dal titul “Le dimensioni spazio-temporali dell’apprendimento: Note per un approccio ecologico alla didattica”.
Pireddu á splighé to so referat danter l’ater les desfarënzies y les cosses che se somiëia danter i conzec de didatica en presënza y destanza. “Un dles desfides dl dagní é da ti dé a dötes les scolares y scolars les competënzes digitales por savëi da se möi tl monn digital y cun i media nüs. Al é ince n compit dla scora da smendrí le "digital divide”, dij Pireddu. Le monn digital sará tres deplü presënt te na manira naturala tla didatica tl dagní te ciamps de interaziun desvalies. N ejëmpl te chësc vers é por Pireddu le fat che les scolares y i scolars ne lí nia demanco aldedaincö, mo ai lí, aladô de stüdi, te na manira desfarënta tres deplü cun mesi digitai.
2970 iscriziuns tles scolines y scores ladines
Tles 17 scolines ladines él inann indöt 626 mitans y mituns scrites y scric ite. Indöt 1129 scolares y scolars é scrites y scric ite te na scora elementares dles valades ladines, 693 tles scores mesanes y 522 tles scores altes y tla scora profescionala dla Val Badia y de Gherdëna. Indöt él 2970 iscriziuns te na scolina y scora dles valades ladines.
De plü inciaries de direziun nöies
L’assessur Alfreider y l’Intendënta Ploner á orü ti dé le bëgnodü ala ispeturia nöia dl insegnamënt dla religiun Agnes Irsara, ala ispeturia y responsabla dl Zënter de competënza Inclujiun y Consulënza Claudia Schrott, la direturia nöia dles scolines “Ladinia” Genny Ploner, ala direturia nöia dla direziun raionala de Sëlva Ute Senoner y ala direturia nöia dl Ciamp pedagogich Maria Kostner (da otober inant).
La festa dles porsones jüdes en ponsiun gnará comunicada aposta.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/rc
