Atualità
Ejams de Stat dla scoles autes ladines: resultac
Cun dantier (4. 7.) à duc i studënc y la studëntes dla scoles autes dla valedes ladines stlut ju l ejam de maduranza. Cater ie passei cun 100.
L atività per l ann de scola 2021/22 se à ufizialmënter stlut ju dantier (4. 7.) l finé via di ejams de maduranza. Tla scoles autes y tla scola prufesciunela dla valedes ladines fovel chëst iede 71 candidates y candidac lascei pro al ejam de maduranza. Duc y dutes à dat ju l ejam y ie passei. Doi candidates y candidac ne fova nia unii lascei pro al ejam. Ndut à 11 candidac y candidates giapà na valutazion danter 61 y 70 ponc, 26 studënc y studëntes danter 71 y 80 ponc, 21 danter 81 y 90 ponc y 9 candidac y candidates à stlut ju la scola auta cun na valutazion danter 91 y 99 ponc. La valutazion de 100 ponc ie chëst ann unida data cater iedesc tla scoles autes ladines y tla scola prufesciunela: l se trata de Geiser Lena (Lizeum d’Ert Cademia), Grünberger Lisa (Lizeum d’Ert Cademia), Lintner Christian (scola prufesciunela) y Senoner Maria Cleo (Istitut Tecnich Economich Raetia).
N à pudù stlù ju i ejams de maduranza coche udù danora, zënza de gran problems per gauja de malaties o carantenes da pert dla cumiscions o di candidac y dla candidates. Te chisc caji fovel udù dant la puscibltà de tò pert al ejam a usc online.
Per cie che reverda la valutazion cumplessiva dla scoles autes ladines ie te chëst ann de scola 2021/22 unii valutei ndut 520 studënc y studëntes. L 83,27 % di studënc y dla studëntes ie passei ala tlas plu auta (433 studënc y studëntes), 54 messerà mo recuperé n valguna materies ntan l instà per passé ala tlas che vën; 33 studënc y studënc ne ie nia passei.
L Assessëur Daniel Alfreider ie cuntënt di bon resultac arjonc dala studëntes y dai studënc de nosta scola ladina y rengrazia la diretëures y i diretëures, la nseniantes y i nsenianc y l personal aministratif per l mpëni y l lëur te nosta cumenanza scolastica. Nosc sistem paritetich y plurilinguistich ti garantësc ala studëntes y ai studënc daniëura la cumpetënzes che ti gëura de plu portes sibe per jì inant cun n stude plu aut, sibe per zapé ite tl mond dl lëur.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
