Atualità
Everyday for Future: cuncors per sculeies y sculées
Cun n cuncors che reverda la sustenibltà tla Provinzia de Bulsan „Everyday for Future“, pensà per sculeies y sculées, uelen ti dé mpurtanza ai 17 fins per n svilup sustenibl ntan l ann de scola 22/23.
La trëi Intendënzes dl Südtirol mët a jì n cuncors per mutons y mutans, jëuni y jëunes de uni livel scolastich ntan l ann de scola 2022/2023 che à da nfé cun l plan per n svilup sustenibl dla Provinzia de Bulsan „Everyday for Future“. I sculeies y la sculées dëssa tres chësc cuncors unì n cuntat cun l tema dla sustenibltà y cun i 17 fins per n svilup sustenibl dla Nazions Unides y mparé a cunëscer l plan per n svilup sustenibl dla Provinzia de Bulsan, spiega i Assessëures per la scoles, che à prejentà ncuei (ai 26 de lugio) l proiet per l cuncors tla Jonta provinziela.
L fin dl proiet ie chël de ti fé cunëscer ai mutons y ala mutans, ai jëuni y ala jëunes i 17 fins globei per n svilup sustenibl dl’Agenda 2030, i nsci tlamei Sustainable Development Goals (SDG). Sculeies y sculées possa tò pert al cuncors cun prudoc, proiec o d’autra scumenciadives y crì ora l mesun de comunicazion a na maniera liedia.
L possa tò pert mutons y mutans, jëuni y jëunes de uni livel scolastich y de duta la trëi rujenedes. N possa tò pert sciche grupa o sciche tlas, ma n muessa unì acumpaniei da na nsenianta/n nseniant o da na educadëssa/n educadëur. Per uniuna dla cater categories (scolina y I/II tlas dla scola elementera; III/IV/V tlas dla scola elementera y I/II tlas dla scola mesana; III tlas dla scola mesana y I/II tlas dla scola auta; III/IV/V tlas dla scola auta) iel udui dant pesc te scioldi, metui a despusizion dala Stiftung Südtiroler Sparkasse, che unirà dac ora n proporzion ala grandëza dla grupa linguistica.
L cuncors unirà scrit ora ufizialmënter dan l scumenciamënt dl ann de scola nuef 2022/2023. L sarà mesun se scrì ite nchin ala fin de setëmber y l lëur messerà unì dat ju nchin ai 20 de jené 2023.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/jw/red
