Atualità

Scora / Cultura | 22.01.2004 | 08:19

Di de lecord ala vitimes dl nazism ai 27 de jené

Usp – Per l cuarto iede uniral n merdi ai 27 de jené lecurdà tla Talia la vitimes dl rejim nazist. Tla scoles dl Südtirol uniral tenì n menut de chiet y riflescion per chësc avenimënt. „Nce nëus duc che vivon tla pesc, libertà y giustizia dasson tenì n mënt la vitimes dl rejim nazist“, scrij i trëi Assessëures ala scola Otto Saurer, Luisa Gnecchi und Florian Mussner te n comunicat.

L 27 de jené 1945 ie stat per i prijunieres dl plu cunesciù y scredità ciamp de cunzentramënt a Auschwitz, l di dla liberazion. N chëi di, da avisa la 11.59 ie la trupes dla nazions aleedes jites ite tl ciamp de cunzentramënt tl Polen. La liberazion de Auschwitz fova tl medem mumënt nce la fin dla ‘Shoah', l’eliminazion sistematica di judieres tres l rejim nazist. „N chël di iel stat na fin cun la descriminiazion y l’eliminazion de chëi che ova n auter pensé da pert dl nazism. Da chësc sfundron dla distruzion, de morc zënza cumpëida y dl dulëur nia da se nmaginé ie l’Europa jita via sun na ulentà nia da femé de arjonjer la pesc y l’unità“, scirij i trëi assessëures ala scola Saurer, Gnecchi y Mussner te na tëuta de posizion. Tres l se paré dal nazism y dal fascism à nce truepa ëiles y ëi da tlo gaipà la forza de se mpenië per libertà y democrazia. Te truep luesc dl Südtirol à i sculeies te chëst’enes l’ucajion de nrescì velch de plù sun la vitimes y fé nce vel riflescion. „Ëi pudrà rujené cun testimonesc dl tëmp y nce tres documentazions dl tëmp ruvé pra cunesciënzes de gran valor. Danterauter pudrà i sculeies nce se de jù cun la luegies dl gran spavënt sciche per ejëmpl l ciamp de perjunia a Bulsan, spiega i Assessëures ala scola. N merdi ai 27 de jené, dala 11.59 tenirà i sculeies tl Südtirol y milions de mutans y mutons unfat vedli tla Talia y duta l’Europa, n menut de lecord y riflescion ala vitimes dl nazism. „Chësc di de lecord dëssa nce vester n di de rengraziamënt per duta la sculees y i sculeies che i posse aldidancuei viver tla pesc, libertà y tla giustizia“, sorissea Saurer, Gnecchi y Mussner.

USP