Atualità
Mëter man dla scola y scolina per ntëur n 90.958 mutons y jëuni
N 90.958 mutons y jëuni mët man ai 5 de setëmber l ann de scolina y scola nuef. I assessëures Achammer, Alfreider y Vettorato mbincia a duc y dutes dl mond dla scolina y scola n ann de suzes.
La feries da d’instà ie tan che finedes. Per i/la diretëures, l personal nseniant y l personal pedagogich dla scolina à l ann de scola y scolina bele scumencià; a livel didatich se anjinia l personal bele da n valguna enes te truepa sentedes. Dai 5 de setëmber frecuenterà n 90.958 mutans y mutons y jëuni y jëunes inò la scolina, la scola elementera, la scola mesana, la scoles autes y prufescioneles.
“Nosta scoles y scolines ie anjiniedes ca bën” dij i assessëures Philipp Achammer, Daniel Alfreider y Giuliano Vettorato, che ti mbincia ala mutans y ai mutons, ala jëunes y ai jëuni truep mumënc che ti resta tl cuer y tres chëi che i/les possa mparé deberieda y se svilupé a livel persunel. A duc y dutes chëles che lëura tl ciamp dla furmazion ti mbincia i trëi assessëures otimism y truepa legrëza per chësta ncëria tan mpurtanta per nosta sozietà.
Sport y ufiertes che va sëura i liviei de scola ora tl zënter dla scoles ladines
Plu muvimënt y sport, coche nce ufiertes che va sëura i liviei de scola ora y la mplementazion dl mparé te lueges ora de scola: chësta tematiches sarà chëst ann de scola mpurtantes tla scoles y scolines de Gherdëina y dla Val Badia. “L’ëures de sport che vën pitedes sëuraprò y l tò ite lueges d’istruzion ora de scola à na fazion positiva sun l svilup di mutons y dla mutans. Ma nce la mplementazion dla lezions te de plu lingac ie premisses mpurtantes per ti dé ai mutons y ala mutans, ai jëuni y ala jëunes de bona cumpetënzes tenian sambën for n uedl sun l ladin sciche rujeneda dl cuer”, nsci l assessëur per la furmazion ladina Alfreider.
Tla scolines ladines iel scrit ite 597 mutons y mutans, tla scoles elementeres ladines 1.183. Tla scoles mesanes ladines iel 664 jëuni y jëunes y tla scoles autes de Urtijëi y de la Ila iel de ndut 344 ntan che tla scola prufesciunela d’artejanat artistich a Urtijëi iel scrit ite 35 jëuni y jëunes.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/san
