Atualità
L Lizeum d’ert "Cademia" pra la giaurida dla "emna rumantscha"
L Lizeum d’ert ladin "Cademia" ie stat pra la giaurida dl’ena culturela retoromana "emna rumantscha" tl "Centro Svizzero di Milano" sun nvit dl Consulat generel dla Svizera de Milan.
Jëuni dala Lombardia, dai Grijons, dala Ladinia y dal Friul cun a cë l artist de street-art Ivan Tresoldi à metù adum deberieda n’opra d’ert aldò dl stil dla "pagina bianca", na gran tëila blancia che cuer ju la chëurt dedite dl’istituzion. I jëuni à purtà si pensieres da culëures te si rujenedes sun la tëila. L’opra d’ert ie unida inaugureda ai 19 de fauré a Milan ntan la giaurida dla "emna rumantscha" y sarà da udëi tl’enes che vën tla chëurt dedite dl zënter culturel. L’ "emna rumantscha" ie n’ena culturela retoromana che fej cunëscer l retoroman n iede al ann tla ambascedes y ti consulac dla Svizera sëura dut l mond tres d‘uni sort de manifestazions. La Ntendënza y cultura ladina cooperea da trëi ani cun l Consulat generel de Milan per urganisé l’ "emna rumantscha". Ti ani 2022 y 2023 iel unì metù a jì Dis de leteratura a Urtijëi y a Persenon n culaburazion cun la Lia Autëures Südtirol – Südtiroler AutorInnenvereinigung. Chëst ann fova Milan l luech de ancunteda per chësta manifestazion che porta de bon fruc.
Pra la giaurida à l vizepresidënt dla jonta provinziela de Bulsan y assessëur ala scola y ala cultura ladina Daniel Alfreider ancuntà l minister per i stac fulestieres svizer Ignazio Cassis y l presidënt dl guviern di Grijons Jon Domenic Parolini. Sëuraprò fovel nce prejënt l reprejentant fascian tl Cunsëi regiunel Luca Guglielmi, la cunseliera dl Cunsëi regiunel dla region Venet Silvia Cestaro, l presidënt dl’Agenzia regiunela per la rujeneda furlana Eros Cisilino sciche nce l ambolt de Milan Giuseppe Sala.
L Lizeum d’ert ladin "Cademia" ie unì reprejentà dal studënt dla terza tlas Lian Peristi. Per ël fovel de gran valor pudëi vester leprò: "L fova na bela esperienza per mé pudëi fé pea pra chësta opra d’ert, coche studënt de na scola auta ladina. L fova nteressant pudëi lauré deberieda cun l artist cunesciù sun l argumënt dla rujeneda dl’oma y l fova n unëur per mé pudëi fé zeche a chësta maniera per l ladin." L assessëur ala scola y ala cultura ladina Daniel Alfreider fova cuntënt dla culaburazion: "L fej plajëi udëi che studënc de nosta scoles autes tol pert a n tel proiet fat deberieda. La culaburazion che va inant da ani danter la Ntendënza y cultura ladina y l Consulat generel dla Svizera desmostra che i liams danter i ladins dla Dolomites y i retoromans di Grijons ie per tradizion bëndebò strënc. L ie n bon ejëmpl che la Svizera ti dà na gran lerch cun l’ 'emna rumantscha' al retoroman y nce al ladin per n’ena ntiera. Ladins, retoromans y furlans ie parënc strënc y l ie bon sce lauron deberieda: pra la rujeneda y la cultura, ma nce te d’autri ciamps sons boni de avëi n fil ndrët danter nosc raions."
L Diretëur de Repartizion Mathias Stuflesser auza ora l valor dla culaburazion danter ladins, retoromans y furlans: "Tl ciamp dla cultura ons da ani na culaburazion che porta si fruc. N cont dl sustëni al’atività culturela te nosta rujenedes de mendranza pudons nce tl daunì mo mparé un dal auter."
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/mst
