Atualità
Ejam de ladin: Cursc de preparaziun fac sön mosüra
Cursc de preparaziun por ejam de ladin: Trami i cursc mët man ai 3 de setëmber. Da se scrí ite él tëmp cina ai 2 de setëmber.
L’ejam de lingaz ladin che l’Intendënza y Cultura ladina mët a jí é n recuisit fondamental por vignun y vignöna che á intenziun da lauré tles scolines, tles scores – ince profescionales y de musiga – di paisc ladins dla provinzia da Balsan, tla funziun dirigenziala o de ispetorat, de insegnant, de personal pedagogich, y de colaboradusc/colaboradësses por l’integraziun. Ma tres chësc ejam él meso da se scrí ite tles gradatöres provinziales.
En cunt de chësc, organisëia la Direziun provinziala Scolines y Scores ladines na secunda sesciun de ejams por l’ann 2024. I recuisic por podëi tó pert, i contignüs, la strotöra y i criters de valutaziun dl ejam é dá dant dal decret 14629/2020 dé fora dala Intendënta y Direturia dles scolines y scores ladines. Le decret, adöm ala zircolara n. 6/2024 dla Intendënta é da ciafé tla plata web dla Direziun provinziala Scolines y Scores ladines, sot la usc “Zircolares”.
L’Istitut ladin Micurá de Rü pita cursc de lingaz aposta por arjigné ca i candidac y les candidates a chësc ejam de ladin, tla varianta badiota y te chëra gherdëna. Sce al é almanco 4 porsones che tol pert, spo é le curs debann.
Indöt vëgnel pité 7 unités, cun 2 ores de curs al iade. Plü importanza ti vëgnel dé ala analisa y al aprofondimënt dles regoles gramaticales y di contignüs. Al vëgn ince fat na simulaziun dl ejam.
Por la Val Badia, vëgn le curs de preparaziun al ejam de ladin dl’Intendënza tigní tla sënta dl Istitut ladin, a San Martin de Tor. Por informaziuns y por l’iscriziun pon cherdé sö le nr 0474 523110 o mené na mail a werner@micura.it.
Por Gherdëna, vëgn le curs tigní tla sënta dl Istitut ladin de Sëlva. Por informaziuns y por l’iscriziun pon cherdé sö le nr 0471 794268 o mené na mail a furmaziun.gh@micura.it.
Trami i cursc mët man ai 3 de setëmber. Da se scrí ite él tëmp cina ai 2 de setëmber.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red/cs
