Atualità
Nfurmazions MINT sota uedl
La homepage pieta na sëuravijion sun la prupostes per furmazions, lëures y manifestazions ti ciamps matematica, informatica, scienzes natureles y tecnica (MINT).
BULSAN (USP). I ciamps MINT cuntribuësc te na maniera senificativa al’inuvazion de na sozietà. L ie minà cun MINT i ciamps dla matematica, dl’informatica, dla scienzes natureles y dla tecnica. L Ufize Urientamënt scolastich y prufesciunel se mpënia a sensibilisé y apasciuné persones de uni età per la materies MINT (Matematica, Informatica, Scienzes Natureles y Tecnica). Nsci nfurmea l ufize sun percursc universiteres y furmatifs defrënc y sun i lëures te chësc ciamp. Ora de chël fejel al savëi canche l ie scumenciadives MINT prupostes da istituzions partner, coche l’intendënza ladina, la direzions per l‘istruzion taliana y tudëscia, l EURAC Research, l NOI Techpark, l’Università Liedia de Bulsan, la Confindustria Südtirol, la Majon dl cumerz, ndustria, artejanat, turism y agricultura de Bulsan, l Museum dla Scienzes y l Forum Prevenzion.
"L sustëni al ciamp MINT ie de mpurtanza fundamentela per l daunì y cuntribuësc te na maniera senificativa al svilup e al'inuvazion. Cun la plataforma nueva ulons ti mustré su ai jëuni ucajions defrëntes y nteressantes te chësc ciamp, fé cunëscer la truepa pusciblteies de formazion y ti dé na sburdla dantaldut a ëiles jëunes a tò n cunscidrazion na cariera tla scienza y tla tecnologia", sotrissea l assessëur Philipp Achammer.
La homepage realiseda da nuef dëssa funziuné da plataforma zentrela per informazions de prupostes-MINT, abiné nfurmazions che reverda ciamps prufesciunei, prupostes per sculées y sculeies, tlasses, nseniantes y nsenianc, prupostes MINT spezificamënter per mutans y prupostes per uni età. L vën nce prejentedes persones che lëura tl ciamp MINT y urganisazions partner y l ie mesun ruvé pra truep links per pudëi jì plu sot tla tematica. N possa ruvé sun la plata cun l link https://berufsberatung-studieninfo.provinz.bz.it/de/mint-suedtirol.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
