Atualità

Scora / Cultura | 24.03.2004 | 14:01

La scola plurilinguistica ladina à n daunì

Usp – Per rujené sun l daunì dla scola ladina se à l assessëur Florian Mussner da permò ancuntà cun i diretëures dla scoles ladines a Al Plan. N ie stai duc a una che la scola ladina avrà bon daunì.

Per l’ancunteda dl’ena passeda fova unic adalerch i diretëures de duc i liviei de scola. Rapresenteda fova a chësta maniera la direzion dla scolines y cater sëntes de raion per la scoles elemeteres y mesanes. Mplu mo la direzions dla scoles autes. I diretëures ladins se à n vënderdi dat jù cun la riforma dla scoles. L Assessëur Mussner à te chësta ucajon lecurdà che la lege finanzieria vëija dant n adatamënt te de plu vares per la scoles dl Südtirol. A uni maniera uniral sëurantëut i prinzipies de basa dla riforma per l ann de scola 2006/07. La modaliteies per l adatamënt n var al iede unirà fates ora dal Guviern provinziel, à dit Mussner. Tlo val debujën de cunsciderazions de basa, che tën dantaldut cont dl nseniamënt te de plu rujenedes tla scola ladina, de chësc fova nce i diretëures presënc a una. N muëssa tenì cont dl’esigënzes spezieles dla scoles dla valedes Ladines à sorissà l Assessëur Ladin. Per l ann de scola che à da unì iel bele unì udù dant la „stieres de ruolo“ a mez tëmp. Na majera discuscion iel unit ora sun i viages de furmazion. La cuestion sce l dëssa valëi diretives provinzieles o la descijion dla scoles autonomes, ie resteda davierta. Nce sce l’esistënza dla scoles autes ladines vën manacedes dal ji ora de cà a scola, à la scola ladina n daunì, nscì l Assessëur ala Scola cun cunvinzion. Chësc dantaldut sce l unissa sorissà miec si pertes positives y si potenzial. Sun chësc pont se à l ntendënt Roland Verra y i presënc mustrà a una. Tl’Europa pudëssa la scola ladina avëi na funzion de ejëmpl per via dl nseniamënt dla rujenedes. Tres ideies didatiches y metodiches tuchedes dëssa la padronanza dla trëi rujenedes provinzieles y dla rujendes fulestiers for inò unì miureda, n sci l ntendënt Verra. Cun i resultac dl studi naziunel „PP3“ che ie da permò unì fat, vëniel a lum aspec sun la singula scoles, à pona juntà l ispetëur Lois Ellecosta. Sën possen dì che la sëntes de raion à purtà de plu continuità danter scola elemetera y mesana, scebën che l ie debujën de lauré inant de chësc viers. N pont positif per la scoles autes de Gherdëina ie la cësa di studënc nueva a Urtijëi, che dëssa tosc unì fata. Pra chësta auncunteda ie nce unì rujenà dla cumpetënzes di nsenianc y dl pudëi mudé plu saurì danter scola profesciunela y scola auta. L assessëur Mussner à fat al savëi de ulëi vijité la defrënta scoles ti proscimi mënsc.

USP

Galaria dales fotografies