Atualità
Gran interès por i cursc de ladin a Balsan
L’Assessorat provinzial por la cultura ladina va inant cun i cursc de ladin dla Val Badia sia por i nia ladins co por i ladins. Dai 4 de mà 2004 inant vëgnel porchël indô pité cursc dagnora tla sënta dl Ofize cultura y scora ladina a Balsan.
Tl mëis de merz de chësc ann él gnü organisé dal Assessorat ladin a Balsan n curs de ladin por prinzipianc’, che à indespré n gran interès da pert di partezipanc’, che à manifesté cun entusiasm le dejidêr de jî inant cun le stüde dl lingaz y dla cultura ladina. Porchël à l’Assessur ala cultura ladina, Florian Mussner, cuntënt dl’atenziun desmostrada dai partezipanc’ por chësta scomenciadia, tut la dezijiun de propone n ater curs por prinzipianc’. Le curs vëgn tignì dai 4 de mà cina ai 3 de jügn 2004 tres de mertesc y jöbia dales 18.00 ales 20.00, por indöt 20 ores, a Balsan tl Ofize cultura y scora ladina, Bindergasse 29. En plü vëgnel proponü n curs dagnora tla varianta dla Val Badia por ladins, che vëgn tignì ince a Balsan tl Ofize dla cultura y scora ladina, Bindergasse 29, dai 4 de mà ai 3 de jügn 2004, tres de mercui y jöbia dales 16.30 ales 18.00, por n total de 15 ores. I cursc vëgn tignis da Daria Valentin, colaboradëssa dl Istitut Cultural Ladin „Micurà de Rü“. Informaziuns y iscriziuns cina ai: 3 de mà 2004 Ofize cultura y scora ladina Bindergasse 29 39100 Balsan Tel. 0471/41 70 20/21 Fax. 0471-41 70 22 E-Mail: katharina.tasser@schule.suedtirol.itUSP
