Atualità
Assegnà i pesc’ por le concurs: “Auturs ladins scrì …”
Maria Pedevilla de La Plì de Mareo y Ivan Senoner de Urtijëi à davangné la pröma ediziun dl concurs leterar ladin “Auturs ladins scrì …”, metü a jì dal Assessorat provinzial por la Cultura ladina
Le pest, a süa pröma ediziun, é gnü scrit fora dal Govern de Südtirol – Assessorat provinzial por la Cultura Ladina sön scomenciadia dl Assessur ladin Florian Mussner. Le fin dl concurs é la promoziun dl lingaz ladin tes sües variantes dla Val Badia y de Gherdëna y suradöt de stimulé ince i jogn a lì y a se dè jö cun dla uma scrit. La iuria, componüda da Brunamaria Dal Lago Veneri sciöche Presidënta Edi Crazzolara, Maria Cristina Senoner y Luis Mahlknecht sciöche comëmbri, à tut la dezijiun de dè le pröm pest ex aequo a Maria Pedevilla da La Plì de Mareo por la cuntia „En amur imposcibl – Na storia desco en atra“ y a Ivan Senoner de Urtijëi por la cuntia „La ueia de pië via”. Entrami ciafarà n pest de 2.500,00 euro, implü la stampa y promoziun dl’opera. Le reconescimënt, aladô dles motivaziuns dla iuria, é gnü dè ai dui scri_ che cunta, te n lingaz cernü y significant, la vita signada dal’esperiënza de chi che vir tles vals ladines. Le test por ladin marou cunta en forma personala de na storia d’amur poscibla - imposcibla cun tröpa frëscheza y richëza. Por ci che reverda l’inrescida linguistica va le reconescimënt ala jona scrituria por la cernüda lezitënta de parores tla vedla musicalité ladina. Le secundo test, por ladin gherdëna, é la trascriziun dl’esperiënza de una esistënza de vita tla val. Les trasformaziuns y mudaziuns dl tëmp y dla lerch vitala vëgn sotrissà da n lessich che ressënt dles mudaziuns che vëgn dala tecnica y dal lingaz da vigni dé, deperpo vëgnel adorè n lingaz nobl da cuntia, canche al se referësc ai sonns y ales figöres dla tradiziun. La data dla premiaziun ofiziala di dui auturs jogn gnarà comunicada plü tert.USP
