Atualità
Presidënt nuef dl Cunsëi Scolastich Provinziel
USP – Tla reunion generela da iner lunesc, 26 de auril, iel ufizialmëter unì sëurandà la ncëria da presidënt dl Cunsëi Scolastich Provinziel a Tiziano Botteselle. L presidënt da dant Siegfried Baur resta vizepresidënt dl Cunsëi deberieda cun Heinrich Videsott per la grupa de rujeneda ladina.
Bele ala fin de fauré i tumei i 18 mësc resservei al presidënt dl Cunsëi Scolastich Provinziel de rujeneda tudëscia. Tla reunion generela de n lunesc 26 de auril à Siegfried Baur formalmënter dat inant la ncëria a Tiziano Botteselle, presidënt nuef de rujeneda taliana. Botteselle ie tl medemo tëmp nce rapresentant di Chemuns de chësc cunsëi. Te chësta ucajon ie Heinrich Videsott unì numinà presidënt dla sezion ladina dl Cunsëi Scolastich. Ël à ncé la funzion de vizepresidënt dl cunsëi generel nscì schiche la ti spieta a Siegfried Baur che resta presidënt dla sezion tudëscia. Ntan i ultimi 18 mënsc ne se à l Cunsëi nia me cunzentrà sun dé l bënsté, ma nce sun discuscions y l lauré ora argumënc dl scola, sciche la riforma, l problem che trupes lascia la scola, la valutazion, la cuestion dla sgonda rujeneda, l mparé te de plu rujenedes o te na scola auta de n’autra rujeneda. I trëi ntendënc ala scoles à rengrazià Siegfried Baur che l se à dat da fé tla ncëria de presidënt y se à mbincià na bona culaburazion cun l presidënt nuef.USP
