Atualità

Scora / Cultura | 02.08.2004 | 14:20

Theodor Rifesser rapresentant ladin tla Jonta dl’Università

USP – Da permò fej l diretëur dl Istitut Pedagogich Ladin, Theodor Rifesser pert dla Jonta dla Università liedia de Bulsan. Per pudëi to ite n rapresentant dla grupa de rujeneda ladina iel stat debujën de fé na mudazion dl statut cun n bensté da Roma. L ie mpurtant che i Ladins sibe nce rapresentei ti organs esecutives de istituzions mpurtantes, à dit l assessëur ladin Florian Mussner cun sodesfazion.

Davia che deguna dla doi ncëries da vizepresidënt tl cunsëi de aministrazioin dla Università Liedia de Bulsan ne ie curida da n Ladin, se à l assessëur ladin Mussner fat inant che n rapresentant dla grupa de rujeneda ladina ruve te jonta. Nce l presidënt dl cunsëi de aminstrazion dl’Università Friedrich Schmidl, fova de chëla de abiné na soluzion che respetea la grupa de rujeneda ladina y à nsci purtà la pruposta de fé na mudazion al statut. Chësta se adrova l bënsté da Roma. Da n struf ie jites ndrova la mudazions dl statut univesiter y nsci à Theodor Rifesser sciche rapresentant di chemuns ladins tl cunsëi dl’Università, nce pudù zapé ite la Jonta de Università. L assessëur ladin Mussner se à detlarà cuntënt de chësta arjonta: „L ie mpurtant che i Ladins ne sibe nia me ti cunsëies de aministrazion, ma nce tla jontes esecutives o sciche vizepresidënc de nosta istituzions plu mpurtantes. Tla jonta dla Università vëniel tëut decisions mpurtantes, te chëles che i bujens di Ladins muessa unì respetei, dantaldut per chël che à da n fé cun la facultà dla scienzes dl’educazion“. Tla facultà dla scienzes dl’educazion dla Università liedia de Bulsan vëniel pità cursc y planns de studi aposta per i Ladins. Rifesser se à bele nchin sën fat inant che chësc nseniamënt vënie mo slargià ora.

USP

Galaria dales fotografies