Atualità
Nvit di assessëures ala scola per l di mundiel dl alfabetisazion
USP – L di mundiel dl’alfabetisazion dl UNESCO, che ie unì cherdà ora per ncuei mierculdi, 8 de setëmber 2004, lecorda che te truep paejes dl mond iel nce mo al diadancuei n privileg a savëi da liejer y da scrì. L fin de chësc di ie de lecurdé l fenomen dl analfabetism y de cumbater decontra. „Savëi da liejer y da scrì ie per uni persona na premissa per si svilup personel y soziel“ scrij i trëi assessëures ala scola Florian Mussner, Luisa Gnecchi y Otto Saurer.
La batalia contra la analfabetism vën dantaprima fata ti paejes dl terzo mond. „Nce l Südtirol dà tlo si contribut susteian de plu proiec te chësc ciamp. Leprò vën sambën l lëur tla scoles y ti zëntresc de furmazion tla provinzia“ nsci Mussner, Gnecchi y Saurer. Nce tl Südtirol iel l fenomen dl analfabetism. Aldò de nrescides che ie da permò unides publichedes, ne ie 1.000 zitadins do avëi finà la scola nia plu boni de liejer na zaita o n liber, ma nce no de scrì na lëtra. „Tres l dipartimënt per la scola y la frumazion prufescionela, se mpënia la Provinzia che nce chisc zitadins giapé la pluscibltà de tré ite si defizit“ sorissea Mussner, Gnecchi y Saurer te si detalarazion. Ti ufizies provinziei de cumpetënza iel nce servijes che juda a dé ureintamënt y cunsulënza a persones che ne ie nia plu drë boni de liejer o de scrì. „Chi che ne ie nia boni de scrì o de lijer, ie plu dëibl permez a d’autri y suvënz nce plu puere, se tëm de plu y ie manco liede permez a d’autri“, dij i assessëures ala scola. Savëi da liejer y da scrì ie per uni persona na premissa mpurtanta per si svilup personel y soziel. Tl Südtirol ie l analfabetism nce da abiné pra i chëi che vën da oradecà, ma suvënz te n’autra forma. Ëi sà da liejer y da scrì, ma nia tla rujenedes dla provinzia. Nce ëi, nsci i assessëures ala scola, à manco pusciblteies per se svilupé inatn. Justa ëi ie dal’autra pert nce na risorsa mpurtanta per l svilup dla provinzia, ie la minonga di assessëures. Nce chëst ann vëniel tenì cursc de alfabetisazion per chëi che vën da oradeca, cun n aiut finanziel dal Fond Soziel Europeich. N ucajion dl di mundiel dl alfabetisazion ie l nvit da pert di assessëures ala scola a duc i zitadins chël de liejer y lejer mo de plù.USP
