Atualità
5 publicazions nueves tl ciamp dla scola y dla educazion
USP - L Intendënza Ladina à laurà ora 5 publicazions nueves per la scoles: “Aules”, “Sann intun”, “Portfolio dla cumpetënzes”, “Portfolio di lingac” y “Uniteies de ELI”. Chësta publicazions possa vester de ntres per duc chei che lëura tl ciamp dl educazion.
“L aumënt dla publicazions nueves tl ciamp dla scola ie sëni de n svilup positif de nosta scola ladina y de nteresc aprofondì per ciamps varies”, à dit l assëssur provinzial Florian Mussner. “Ënghe per i nsenianc ie i foliec nueves de aiut sibe per la pert didatica y metodica dl nseniamënt, ma ënghe per la nfurmazions atueles. Ie ulësse rengrazië duta chëla persones che mët gran mpëni per arjonjer tres de nuef obietifs”, à l dit.
L ie la nueva edizion dla revista dla scola ladina “Aules”. La revista dëssa vester na funestra davierta sun les scoles ladines y vën spartida ora a duc i nsenianc.
Depona iel la publicazion anuela dl Servij per la educazion ala sanità dl Intendënza Ladina dal titul “Sann intun”, coordineda y redazioneda dal Prof. Lois Kastlunger. Te chësc cajo iel i nsenianc à documentà si proiec tl ciamp dla educazion ala sanità.
Per merit dl Ispetëur Lois Ellecosta iel unì fat da na grupa de lëur che ël à coordinà l prim model de Portfolio dla cumpetënzes, che unirà purvà ora tla prima tlasses dla scoles elementeres ladines, daujin ala schedes de valutazion tradiziuneles. L Intendënza Ladina mët nscì a disposizion n mesun de lëur che la autra scoles dla provinzia muessa se fé ëiles nstësses y n spera de dé nscì n aiut concret per la aplicazion dla reform.
N auter portfolio, chël di lingac ie l frut de n gran lëur che ie unì fat deberieda danter Istitut Pedagogich Ladin (IPL) y Intendënza Ladina, dantaldut da pert dla Prof. Gretl Senoner y dl Ispetëur Lois Ellecosta. Chësc mesun de valutazion dla cumpetënzes plurilinguales vën sën mandà inant ala Union Europeica per la validazion, ma l vën sperimentà inant te la scoles ladines coche bele l ann passà.
Ala fin iel na produzion de nseniantes che à laurà tl ciamp dla educazion linguistica integreda, dat ora dal IPL cun la consulënza dl prof. universiter Werner Carigiet di Grijons. Chësta uniteies de lëur possa vester de utl per i maestri dla scoles elementeres che lëura tl labor interlinguistich tla prima y segonda tlasses. L pudëssa nce unì nuzà dala scolines per ativiteies ludiches interlinguistiches y nce dai autri livei de scola sciche ejëmpl de chësta sperienzes inovatives.
“Cun chësta publicazions uel l Intendënza Ladina y l IPL sustenì y documenté l lëur de nosta istituzions formatives, che sl meritëssa ënghe da n publich plu lerch”, à dit l intendënt dla scola ladina, Roland Verra.
SAN
