Atualità
Publicazion nueva sun la scoles ladines
USP - L plurilinguism ie n pont carateristich dl sistem scolastich tla valedes ladines dla provinzia de Bulsan. L Intendent Roland Verra se à bele tl passà dat ju dassen cun chesc argument. Tla publicazion "Ladinisch.Paritätisch. Mehrsprachig", che ie permò unida ora, val ite avisa sun l tema di lingac tla scoles ladines.
Te si nueva publicazion "Ladinisch.Paritätisch.Mehrsprachig-Aspekte der Mehrsprachigkeit in den ladinischen Schulen" prova l Intendent ladin de dessenie n cheder generel dla storia, dl urdinament y dl nseniament tl model scolastich dla scoles di luesc ladins. Dantaldut veniel auzà ora la nueva tendenzes tl nseniament plurilinguistich, coche per ejempl l nseniament linguistich integrà. Pra la publicazion toca nce i "Urientamenc educativfs per la scoles ladines", laurei ora da na grupa de leur aposta dla Intendenza Ladina.
La publicazion, drucheda tla Stamparia dla Provinzia, ven sen spartida ora te duta la scoles y istituzions formatives de Südtirol. "A chesta maniera dessa duc chei che leura tl ciamp educatif pudei cunescer miec nosc model scolastich", dij Verra.
L model scolastich ladin ven tlamà "paritetich", davia che la doi rujenedes talian y tudesch ven adurvedes ala per coche lingac de nseniament. Chel uel dì che l nseniament ven urganisà a na maniera che ala fin dl ziclus educatif dessa l sculé cunescer i doi lingac feter al medemo livel. L ladin, che ie l lingaz dla oma o de familia de gra pert di sculeies, ven adurvà da una pert coche lingaz de spiegazion, dal' autra pert iel n nseniament autonom, daujin ala autra materies.
SAN
