Atualità
“Dé internazional di dërc dl’infanzia” - detlaraziun di assessurs Saurer, Mussner y dl’assessuria Gnecchi
Ince en chësc ann gnaràl tignì ai 20 de novëmber sura döt le monn le “Dé internazional di dërc dl’infanzia”. Chësc dé se basëia sön la Convenziun internazionala aprovada dal’Adunanza dles Naziuns Unides ai 20 de novëmber dl 1989 tla cité de New York. Cina sëgn é la Convenziun gnüda ratificada da 190 paîsc dl monn, tolon fora i Stac Unis y la Somalia.
I assessurs Otto Saurer, Florian Mussner y l’assessuria Luisa Gnecchi recorda chësc dé alzan fora la gran importanza dl dërt al’istruziun, n dërt che ne ti vëgn nia ćiamò garantì a düć mo che é garanzia de bëgnester y speranza de poscibilitês valies danter jones y jogn tl monn. Tres chësta Convenziun é i stać che l’à sotescrita cherdà a adatè les normes de so dërt a chël dla Convenziun por che i dërć y les libertês protlamades devëntes realté. Inće sce nosta provinzia é ma na picia realté tl confrunt dles dimenjiuns planetares de chësta Convenziun él impò important sotligné che te Südtirol él gnü fat tröp por i dërć dl’infanzia, dantadöt por ti jì adincuntra ai bojëgns dles families. Na politica efiziënta ti confrunć dl’infanzia tol ite n pü düć i ćiamps: le monn dla cultura y dl’istruziun, i ćiamps dl laûr y dl’ocupaziun, dla sanité y dl sozial. Sambëgn à inće la sconanza dl ambiënt y le control dl trafich conseguënzes diretes sön l’infanzia. Ti ultimi agn él gnü stlüt jö de plü convenziuns danter la Provinzia y les cooperatives de “Uma dl dé” por ti jì adincuntra ales families nia ma a Balsan mo inće tles valades. Implü vëgnel metü bel plan sö inće “scolines aziëndales” y scores a tëmp plëgn. Fora de chël él l’ann passè inće gnü istituì l’antizipaziun dl assëgn de mantegnimënt por umes te situaziuns de bojëgn. Inultima déssel inće gnì recordè la dezijiun che é gnüda tuta ultimamënter dala Junta provinzila de ti dè ales families, cun n davagn che va sot ai 80.000 euro al ann y cun n möt sot ai trëi agn, 80 euro al mëis. Chësc dess ester n sëgn d’atenziun ti confrunć dles families che n’é nia da ciafè te d’atres provinzies talianes. La Junta provinziala ô inće mëte a desposiziun 10 miliuns de euro por le 2005 por garantì ales mitans y ai mituns de nosta provinzia de podëi se stè saurì te nosta sozieté.USP
