Atualità
L’assessur Mussner sön le "Dé internazional dl lingaz dla uma"
USP - Por nos Ladins sciöche mendranza é le mantegnimënt y la promoziun dl lingaz dla uma de importanza vitala” à sotligné l’assessur Mussner en gaujiun dl „Dé internazional dl lingaz dla uma“, che vëgn tignì vigni ann ai 21 de forà. Implü rengraziëia Mussner dötes les porsones che se dà da fà por conservè y coltivé le lingaz ladin. Le fin de chësc dé mondial metü a jì dal’ONU por l’educaziun, la sciënza y la cultura é la sconanza di feter 6000 lingac slarià fora sura döt le monn.
“Por nos Ladins él de gran importanza adorè nosc lingaz cun cosciënza y le conservè cun pôra. Chilò él dantadöt chi che laora tl ćiamp dla formaziun che à na inćiaria importanta y assolutamënter nezesciara, chëra de ćiarè dl lingaz dla uma“, à dit l’assessur ladin Florian Mussner. Propi te n tëmp olache le lingaz vëgn feter sburlé n pü sön na pert da imajes y simboi y olache le lingaz instës manacia da deventé plü püre de ći ch’al n’é tres abreviaziuns, locuziuns stereotipades y modei falc, à la conservaziun dl lingaz dla uma tles scores na valüta ćiamò majera. Le “Dé dl lingaz dla uma“ é n’ocajiun por surantó te na manira cosciënta la responsabilité de mantignì ativamënter nosc lingaz dla uma, le ladin. Di presciapüch 6000 lingac che vëgn baià sön la tera adora propi le nost na sconanza particolara. Sciöche tröc d’atri lingac vëgn inće nosc lingaz ladin do la rata ma baié da püces porsones. Mesanamënter vëgnel desmentié sura döt le monn dui lingac al mëis” à alzè fora l’assessur Mussner. La scora, la familia y inće la politica tol ite na funziun de sconanza importanta por chisc pici lingac preziusc. Le dërt de podëi adorè le lingaz dla uma é de gran importanza y nezescité por che la porsona crësces sö te süa individualité te na manira sana y sterscia. “Chilò oressi zité Ghandi che à tlermënter dit: ‘Na formaziun efiziënta ne po nia gnì a s’al dè tres n lingaz forest. Ma le lingaz dla uma po stimulé l’autonomia dl pinsier pro la gran maioranza dles porsones’ ” à dit Mussner. Dal’atra pert à l’assessur alzè fora ch’al é de importanza promöi l’imparè di lingac. Savëi n secundo o n terzo lingaz ô sambëgn dì amplié l’orizont cultural y odëi les cosses dl monn cun d’atri edli. “I oress tó l’ocajiun por ti dì giulan a chës porsones che se dà da fà por le mantegnimënt y le svilup positif de nosc lingaz ladin” á dit Mussner.USP
