Atualità
L’assessur Mussner: tles scores elementares pol pié ia la sperimentaziun dla reforma dla scora
USP - Ince la scora ladina porvarà fora tl ann de scora 2005/2006 la reforma dla scora. Incö lönesc, ai 7 de merz 2005, à la Junta provinziala fat fora sciöche la reforma dla scora gnarà concretisada. Insciö gnaràl porvè fora ince tles scores ladines l’insegnamënt individualisé cun materies de basa, materies opzionales d’oblianza y materies opzionales, le sostëgn individualisé tl imparè tres n tutor y ince le portfolio sciöche stromënt de valutaziun.
Incö à la Junta provinziala stabilì le plann de ores por l’ann de scora che vëgn. Tla scora elementara gnaràl sperimenté la reforma dla scora bele tl ann de scora che vëgn, tla scora mesana pormò tl ann de scora 2006/2007. Tles prömes trëi tlasses dla scora elementara saràl alplü 29 ores d’insegnamënt; chësc ô dì 25 ores por les materies de basa, öna por la materia opzionala d’oblianza y trëi por la materia opzionala. Tla cuarta y cuinta tlassa él preodü alplü 30 ores al’edema: 27 ores é resservades por les materies de basa, öna por la materia opzionala d’oblianza y döes por les materies opzionales. Les scores mesanes pitarà al mascimo 32 ores d’insegnamënt al’edema; 29 de chëstes gnarà adorades por les materies de basa, öna por la materia opzionala d’oblianza y döes por les materies opzionales. “Les materies opzionales d’oblianza y les materies opzionales gnarà stabilides autonomamënter de scora en scora, aladô dl profil dla scora” à splighé Alexander Prinoth, diretur dla Repartiziun scora y cultura ladina. N’unité de leziun sarà de 60 menüć. Chësta programaziun de ores ti gnarà śëgn metüda dant al ministêr dl’istruziun por l’aprovaziun y spo gnarà le decret corespognënt sotescrit dal Presidënt dla Provinzia. Tla cuinta tlassa elementara gnaràl pité bele dal ann de scora 2006/2007 döes ores de inglesc y tl ann de scora 2007/2008 bele dala cuarta tlassa inant. “I me darà da fà por ch’al sides inće a desposiziun les ressurses relatives”, à impormetü l’assessur Mussner a chël ch’al ti sta dër a cör l’insegnamënt di lingac foresć tles scores ladines. Tles prömes trëi tlasses dla scora elementara gnaràl implü valuté les scolares y i scolars cun le portfolio. Por la consulënza de scolares y scolars gnaràl inće metü sö la figöra dl “tutor”. Ćiamò tratan le 2006 gnaràl dè jö tl’Intendënza da pert de vigni scora na relaziun sura les esperiënzes fates cun la sperimentaziun dla reforma. Dles esperiënzes fates déssel spo inće gnì tignì cunt tla lege provinziala relativa. Tles edemes che vëgn informarà l’assessur Mussner la zitadinanza interessada tla Val Badia y te Gherdëna sura la reforma dla scora por les scores elementares y mesanes dles valades ladines.USP
