Aktuelles
La scola ladina vën prejenteda ai 22 de nuvëmber pra la Fiera dla Furmazion „Futurum“
LPA - Ai 22 de nuvëmber 2007 pra la Fiera dla Furmazion „Futurum“, tl Zënter di Cungresc Sheraton, van ite plu avisa sun la scola ladina y si particulariteies. L Assessëur provinziel per la scola y cultura ladina Florian Mussner, l Ntendënt dla scoles ladines Roland Verra y l Presidënt dl cumité per l’evaluazion dla scoles ladines Lois Ellecosta rejona dla scoles de Gherdëina y dla Val Badia. Duc i nteressei ie nviei a unì a scuté su y a pudëi nsci se nfurmé plu avisa sun la Scola Ladina.
La carateristica prinzipela dla Scola Ladina ie zënzauter l plurilinguism che ie bele da udëi tla scolina. L ie na scola paritetica, ajache l nseniamënt ie partì su danter talian y tudësch, ma l vën nce nsenià la rujeneda y cultura ladina. L model paritetich ladin ie mé te Gherdëina y tla Val Badia, te 8 chemuns y plu avisa tla scoles de Urtijëi, de S. Cristina, de Sëlva y tla scoles dla frazions ladines de Ciastel coche nce a Curvea, Badia, La Val, San Martin y Al Plan. La Fiera dla Furmazion “Futurum” auza ora la particulariteies dl sistem paritetich ladin.
Do la paroles de salut da pert dl Assessëur per la Scola y Cultura Ladina Mussner tën l Ntendënt dla scoles ladines Roland Verra n referat sun i aspec didatics-educatifs dla Scola Ladina.
Dopro vëniel prejentà l liber, scrit te 4 rujenedes, „La scora ladina - Die ladinischen Schulen in Südtirol - Le scuole nelle valli ladine di Badia e Gardena“, dat ora dal Cumité per l’evaluazion dla scoles ladines (BZ). La prejentazion ie tla mans dl Presidënt dl cumité per l’evaluazion dla scoles ladines Lois Ellecosta.
Duc i nteressei ie nviei a unì a scuté su y a pudëi nsci cunëscer miec la scola ladina. L danmesdì mët man dala 9.30 y jirà inant nchin ala 11.
I media ie nviei
ala prejentazion dla scola ladina y dl liber
„La scora ladina - Die ladinischen Schulen in Südtirol - Le scuole nelle valli ladine di Badia e Gardena“
n juebia, ai 22 de nuvëmber 2007 dala 9.30 - 11
tl self “Alois Lageder”, tl Zënter di Cungresc Sheraton
a Bulsan, Plaza dla Fiera 1.
USP
