Atualità

Cun la publicaziun nöia dl Museum Ladin vëgnel a löm informaziuns nöies sön la jona d’Al Plan de Mareo Catarina Lanz che á combatü por la liberté. Le liber vëgn presenté en sabeda, ai 16 d’aurí tl salf dles manifestaziun a Al Plan de Mareo dai auturs Lois Craffonara y Helga Dorsch. Ala presentaziun tolel ince pert l’assessur ladin Florian Mussner y le diretur dl Museum Ladin Stefan Planker.

La ediziun 2016 dl tornê de hockey danter les scores mesanes dles valades ladines é jüda a piz inier, jöbia ai 07 de aurí, a Cianacëi. Jogadus de Gherdëna, dla Val Badia, de Fodom/Alleghe, de Ampëz y de Fascia á combatü por le titul „campiun de hockey interladin 2016“. Le prömes trëi posiziuns é jüdes a Ampëz, Fascia y Gherdëna.

Le minister di afars cun l’ester Sebastian Kurz s’á incunté incö, jöbia ai 7 de aurí, sön invit dl presidënt dla Provinzia Arno Kompatscher a Balsan cun i trëi presidënc dl’Euregio. Danter l’ater él gnü traté la problematica di profugs, i controi söl confin dl Prener, le svilup dl’autonomia y la tlausola de proteziun dl’Austria.

Cöi adöm propostes por ajorné la colaboraziun danter scolina, scora y families é la tematica prinzipala de döes sëres de discusciun ai 14 d’aurí a Urtijëi (dales 20:00) y ai 21 d’aurí a La Ila (dales 16:30). Les incuntades vëgn metüdes da jí dal’Intendënza ladina, ala pert ince l’assessur por la scora ladina Florian Mussner y l’intendënt Roland Verra. Düc é inviá.

Te Südtirol röiel lapró indöt 96 maestri dai schi nüs, partis sö danter schi alpin y snowboard, 3 maestri dl telemark y 15 direturs de scora dai schi: i diploms é gnü surandá incö (ai 6 de aurí) a Balsan tl contest dla Fiera ProWinter. Danter i maestri nüs ince l’atleta Manuela Mölgg y l’atlet Alex Zingerle.

En sabeda, ai 9 de aurí, gnarál metü a jí dales 10.30 tla sënta dla Biblioteca provinzala dla Teßmann na mësa torona sön la relevanza dla cultura y dl ert por la popolaziun dl Südtirol. La scomenciadia vëgn organisada adöm ala Lia di artisć dl Südtirol.

La Junta provinziala á aprové incö (ai 5 de aurí) le program d’esecuziun dles costruziuns publiches por i proscims trëi agn 2016 – 2018. Por l’ann atual él a desposiziun 47,4 miliuns de euro, tl 2017 sarál a desposiziun 46,7 miliuns y por le 2018 indöt 45,4 miliuns. I intervënc reverda danter l’ater scores, üties y strotöres soziosanitares.

Les mudaziuns de n valgügn criters de valutaziun dl davagn tres la DURP, la „Detlaraziun Unificada de Davagn y Patrimone“ é gnüdes aproades incö (ai 05 de aurí) dala Junta provinziala. Cun i adatamënc gnarál garantí prestaziuns plü mirades y al gnará mioré ciamó deplü le sistem.

Ince les porsones cun handicaps, maraties psichiches o cun problems de dependënza ará azes a n contrat regolar de lernerat tl contest dles mosöres de reabilitaziun dl laur por ciafé n atetst de na scora profescionala. I criters che reverda la formaziun aziendala é gnüs aprová incö (ai 5 de aurí) dala Junta provinziala.

Indöt 150 é i posć resservá ai jogn dai 18 ai 28 agn che ó tl 2016 fá na perioda de sorvisc zivil volontar provinzial. Les organisaziuns che é scrites ite tl register aposta é 58, la Junta provinziala á aprové incö, ai 05 de aurí, la bandida che ti consënt ales assoziaziuns y ai ënc da presenté sü proiec cina ai 10 de jügn.