Atualità

Indöt á 42 educadësses y educadus, en gran pert dla scora ladina, stlüt jö en sabeda, ai 30 de jená, la scoraziun „Montessori“ metüda a jí dal Ciamp Inovaziun y Consulënza adöm cun la Akademie Montessori Biberkor de Paiern. „La scora ladina pó amplié insciö süa oferta formativa cun na forma de pedagogia de valüta internazionala“, á sotligné l’assessur Mussner pro la surandada di diploms.

Ai messass jí en forza cun le mëteman dl isté i criters de sostëgn nüs che reverda les ativités da d’isté y dl domisdé di mituns y di jogn. I contignüs dla reforma ti é gnüs presentá ales assoziaziuns, cooperatives y organisaziuns che laora tl setur dl’assessuria Waltraud Deeg y dal diretur dl’Agenzia por la familia Stefan Walder.

L’Intendënza scolastica ladina á publiché incö (ai 29 de jená) les materies di ejams de maduranza tles scores altes che reverda la secunda proa scrita. La data de scomenciamënt di ejams é chësc ann ai 22 de jügn dl 2016. 100 é atualmënter les scolares y i scolars che frecuentëia na cuinta tlassa dles scores altes ladines.

La Biblioteca provinziala todëscia „Friedrich Teßmann“ y la Biblioteca provinziala taliana "Claudia Augusta" lascia alessëi che les strotöres restará davertes ma cina les 12.30 ai 04 de forá (Jöbia grassa) y ai 09 de forá (Carlascé).

En colaboraziun cun l’Akademie Montessori Biberkor dl Paiern á le Ciamp Inovaziun y Consulënza organisé na scoraziun de dui agn che reverda la metoda d’insegnamënt Montessori y süa atuaziun tles scores elementares y scolines tles valades ladines. Do la proa de contlujiun ti gnarál surandé ales partezipantes en sabeda ai 30 de jená i diploms tla scora elementara de Urtijëi.

Plü controi de velozité y na maiú colaboraziun cun le Trentin y le Tirol. Chisc é i obietifs dla campagna de sensibilisaziun sön la segurëza sön strada No Credit, piada ia tl 2006. Sön proposta dl assessur Florian Mussner á la Junta provinziala aprové le program por le 2016. „La segurëza é fondamentala sön strada – comentëia Mussner – y al vá debojëgn de na sensibilisaziun costanta.“

Scuné la ntegrità y cunservé la carateristiches straurdeneres dla Dolomites: a chësc mira la strategia cumplessiva de gestion dla Dolomites patrimone mundiel UNESCO. La strategia ie unida apurveda ncuei dala Jonta provinziela. Cater ie i ponc tlé cun la mesures curespundëntes.

Do le start dla macroregiun alpina vëgnel sëgn lauré sön le Strategy Point de EUSALP pro la sënta coletiva dl’Euregio a Bruxelles. “I sun tl fá n valgügn vari inant – á sotligné Arno Kompatscher – y l’Euregio se á desmostré n ater iade che ara é na plataforma istituzionala che funzionëia.”

Intervënc por smendrí le numer di migranc, spartiziun sön döt le teritore statal di profugs che passa tres le Prener, provedimënc por daidé le Nord Est da avalié la presënza dles porsones che damana do asil. Chëstes é les trëi ghiranzes da pert dl presidënt dla Provinzia Arno Kompatscher „por afronté n’emergënza de dimenjiuns internazionales che se damana n intervënt de döta l’UE.“

Indoman, mercui ai 27 de jená, sará le presidënt dla Provinzia Arno Kompatscher a Roma olache al incuntará i atri surastanc dles autonomies speziales por tó pert a n’incuntada dal titul „Le dagní dles Regiuns cun n statut spezial en relaziun ala reforma costituzionala“.