Atualità

Le proiet dl ampliamënt dla plaza dai fligri da Balsan messará gní sotmetüda a n screening ambiental che gnará coordiné dal’Agenzia provinziala por l’ambiënt. La documentaziun é gnüda dada jö inier (ai 25/01) dala ABD, la sozieté che gestësc l’aeroport. „L’APPA – sotlignëia l’assessur Richard Theiner – garantësc na valutaziun ogetiva y independënta, y ince i zitadins podará dé jö süa minunga."

Cina ai 29 de forá dl 2016 sarál poscibl da presenté les teses de laurea, les teses de dotorat, de master y i laurs d’inrescida che reverda la condiziuns dles ëres tla sozieté o l’ avalianza dles oportunités danter ëra y ël por fá para al concurs organisé dala Comisciun provinziala por l’ avalianza dles oportunités.

Le termo por la presentaziun dles domandes de contribut 2016 da pert dles assoziaziuns atives ti seturs dl sport y dl tëmp lëde toma ai 31 de jená. Chësc lascia alsavëi l’Ofize Sport y promoziun dla sanité.

La Junta provinziala á aprové le program d’ativité dl 2016 dl Comité etich. Tl ann che á impormó metü man gnarál aprofondí la discusciun y al gnará porté dant idees y propostes sön chisc argomënc: le testamënt biologich, le scomenciamënt y la fin dla vita, la dejabilité, la donaziun de organs y la spartiziun dles ressurses.

Cun le scomenciamënt de merz gnarál tigní les proes d’idoneité por maestri di schi y dla brëia. Les iscirziuns al’ejame mëss gní presentades al’Area funzionala turism dla Provinzia cina ai 24 de forá dl 2016.

Le presidënt dla Provinzia Arno Kompatscher y i suranstanc dles atres regiuns dará le start ofzial ala macroregiun alpina (EUSALP) en lönesc ai 25 de jená a Brdo tla Slovenia: al evënt sarál ince presëntes les comissares UE por les Politiches regionales Corina Cretu y por i Trasporc, Violeta Bulc, y de plü Ministri di Paisc interessá.

Le Consëi scolastich cun a cé la presidënta Edith Ploner á dé inier ai 18 de jená so arat positif al dessëgn de lege provinziala por l’atuaziun dla reforma statala „La Buona Scuola“ (lege n. 107/2015) te Südtirol.

Por cherié na rëi europeica ecologica ince tl Südtirol él gnü identifiché i raiuns de Natöra 2000. Sëgn dessel gní trasformé, aladô dles normes europeiches, chisc „Raiuns de importanza comunitara“ te „Raiuns de conservaziun speziai “. Incö, ai 19 de jená, á la Junta provinziala scomencé la prozedöra nezesciara che reverda 35 raiuns.

„La metüda en discusciun dl tratat de Schengen ne é nia da azeté“: cun chëstes parores á le presidënt Arno Kompatscher porté dant la posiziun dla Junta provinziala tla chestiun dles noeles che trata de n aumënt di controi sön i confins statai. „I sun tl laur da s’arjigné ca a vigni situaziun poscibla tl dagní“, á ajunté Kompatscher.

La Junta provinziala á aprové incö ai 19 de jená le program 2016 che reverda i intervënc de manutenziun ordinara y straordinara di bëgns imobiliars de competënza provinziala, cun investimënc por na spëisa complessiva de zirca 12,7 miliuns de euro.