Atualità

Descurí la storia locala, modernisé l’insegnamënt dl ladin y ester de sostëgn por insegnanc y scolars: le Ciamp Inovaziun y Consulënza á publiché indöt 6 unités didatiches nöies por les scores altes che ti vá a funz a de plü periodes dla storia dles valades ladines. Le publicaziuns didatiches ti é gnüdes presentades incö (30/11) ai insegnanc tla sënta dl Museum Ladin Ciastel de Tor a San Martin.

Tl 2014 ê le numer di implanc portamunt te Südtirol indöt 372 cun na capazité de trasport de 512.126 passajiers al’ora. Chisc dac y tröc de plü é contignüs tla brosciüra nöia dl Ofize Implanc portamunt. „Por le bun funzionamënt dla sajun da d’invern é chisc implanc un di pilastri plü importanc por le turism“, sotlignëia l’assessur Florian Mussner. Dui lifc nüs é gnüs realisá tl’Alta Badia.

I aspec desvalies che reverda la mobilité te Südtirol, cun ince la plaza di fligri da Balsan, é stá tl zënter incö (ai 26 de novëmber) de n’incuntada a Balsan danter le presidënt dla Provinzia Arno Kompatscher y l’assessur por la mobilité Florian Mussner cun i partners soziai y les assoziaziuns de categoria.

Jochen Jung, autur, letur y un di plü gragn editurs dla leteratöra todëscia sará le ghest d’onur en mercui ai 2 de dezëmber dla biblioteca provinziala Teßmann da Balsan por na sëra de discusciun y presentaziun de sües incuntades leterares cun poetësses y poec dl passé y dl presënt.

D’isté él gnü aprové la reforma scolastica cun la lege „La Buona Scuola“ che gnará sëgn adatada ales leges provinziales. Por fá chësc vare deboriada inviëia l’assessur Mussner y l’intendënt Verra döt le personal didatich, i rapresentanc di geniturs y studënc a döes sëres de dialogh a Urtijëi (03/12) y San Martin (10/12) por informé en cunt di mudamënc che gnará a s’l’dé tl sistem scolastich ladin.

La prozedöra urbanistica por la costruziun dl palaz provinzial nü tla strada via Renon a Balsan á fat n vare important inant. La Junta provinziala á dé arat positif al plann d’atuaziun dl proiet y che é la basa urbanistica por la realisaziun dl’opera. „Sön dorada lungia sarál poscibl da sparagné tröpes spëises, ince por l’eliminaziun di cosć d’afit atuai“, insciö le presidënt Kompatscher.

Por promöie na mobilité tres plü sostenibla danter le Ciadura y l’Alta Val de Puster ó la Junta provinziala realisé n coliamënt dla ferata. Incö, mertesc ai 24 de novëmber, á la Junta provinziala stabilí l’aprovaziun de n protocol d’intenüda cun la Regiun Venet che prevëiga la realisaziun de n stüde de fatibilité por l’ativaziun de na linia dla ferata.

Al é gnü prolungé ciamó por trëi agn i coliamënc direc cun le bus danter la Talia y la Svizera sön la trassa danter Müstair-Mals y Martina-Nauders-Mals. La convenziun, a chëra che al tol pert la Provinzia de Balsan, le Ciantun di Grijiuns, la SAD y le PostAuto Schweiz, é gnüda aprovada incö, ai 24 de novëmber dala Junta provinziala sön proposta dl assessur Florian Mussner.

Al vá inant le percurs de definiziun de düc i aspec che reverda la fujiun danter SEL Spa y AEW Spa. La Junta provinziala á dé incö (ai 24 de novëmber) süa aprovaziun ai proscims dui vari tl prozes de reorganisaziun dl setur dl’energia tl Südtirol: da öna na pert la prorogaziun dl termin dla conclujiun dl’operaziun de fujiun, dal’atra pert l’aprovaziun dles condiziuns stabilides dal’Antitrust.

La Junta provinziala á tut la dezijiun incö da renové la colaboraziun cun i trëi istituc dl’Austria che é spezialisá tl tratamënt de patologies gravëntes dla dependënza da alcol y da medejines y tles problematiches coliades. Les convenziuns spezifiches é gnüdes renovades incö ai 24 de novëmber dala Junta.