Atualità

En domënia, ai 24 d’otober – de dles biblioteches – mët man tla Biblioteca provinziala le proiet dla biblioteca te döta la provinzia de n ann. 12 artistes y artisć dl Südtirol se dá jö cun i preiudizi sön la migraziun y laora fora na cherta postala. Les chertes é spostamënc – displacements – opiniuns corëntes dla minunga publica – positions– sön la migraziun.

Le proiet „Families renforzades“ se dá jö dötaurela cun la tematica dla separaziun y dl devorz: l’assessuria provinziala Waltraud Deeg á debatü cun i rapresentanc dles trëi Intendënzes y dl Departimënt Sanité y politiches soziales por stabilí n program cun mosöres concretes de sostëgn te chësc setur.

N miliun de euro implü por les families: chësta soma é gnüda aprovada inier ai 21 d’otober dala Junta regionala y ti pormët insciö ala Provinzia de Baslan da ativé na seria de proiec. Chël plü important reverda le sostëgn al tëmp de paternité damané dai peri.

Diesc agn do la mort dl regist sütirolej ti dedichëia la biblioteca provinziala Teßmann da Balsan na sëra d’aprofondimënt ai 29 d’otober al regist de films Ivo Barnabò Micheli da Bornech. Micheli á realisé i pröms gragn films sön Pier Paolo Pasolini, Heinrich Böll y N.C. Kaser. Ala Teßmann gnarál presenté n liber y n documentar. L’entrada é debann.

Por le setimo iade inviëia plü de 100 biblioteches te döt Südtirol al „De dles Bilioteches“ ai 24 d’otober dl 2015. Al vëgn pité scomenciadies de letöra y ativités leterares tratan döt le findledema y ince cina l’edema che vëgn. Danter l’ater él sön le program incuntades cun i auturs, presentaziun de libri, ativités tles scores yii. De plü é ince les ativités tles valades ladines.

La Junta provinziala á aprové incö danmisdé (ai 20 d’otober) la proposta de lege che contëgn les normes sön l’aeroport da Balsan. Le ddl, partí sö te sis articui, é gnü presenté dal presidënt dla Provinzia Arno Kompatscher incö domisdé te n’aldiziun al Consëi provinzial. Al é ince gnü presenté le plann de svilup strategich.

I criters por la conzesciun di contribuc por le sostëgn dles ativités de laur por y cun la jonëza di grups linguistics todësch y ladin é gnüs aprová incö, mertesc ai 20 d’otober, dala Junta provinziala sön proposta dl assessur Philipp Achammer. Le percurs burocratich é gnü scemplifiché, le paiamënt antizipé sará majer.

Les prömes 21 üties da munt dla Provinzia podará tosc gní assegnades tres singules gares. Cun la löm vërda da pert dla Junta provinziala ales condiziuns de partezipaziun y ai criters de cualité da respeté, pó le percurs d’assegnaziun sëgn pié ia. I contrac sará varënc dal mëis de jená dl 2016 inant.

Le Conservatore Monteverdi de Balsan pitará dal ann academich 2015/16 inant n curs de secundo livel por la formaziun de maestri de musiga che insegna da soné n stromënt: la Junta provinziala á aprové incö, mertesc ai 20 d’otober, la deliberaziun che autorisëia l’ativaziun di cursc. I posć de stüde preodüs é 34 por todësch y 12 por talian.

Dal 2016 inant deventará operativa tl Südtirol l’aziënda speziala nöia che é nasciüda dala fujiun danter cater fornidus locai de sorvisc tl ciamp economich: BLS, EOS, SMG y TIS. Incö á la Junta provinziala aprové l’istituziun dl’aziënda speziala nöia y so statut.