Atualità

Les aziëndes dl turism dl Südtirol ára la poscibilité da ester portadësses dl logo europeich Ecolabel cun n’atenziun particolara por l’ambiënt: la Junta provinziala á aprové incö (29/09) na convenziun bienala danter l’ISPRA y l’Agenzia por l’ambiënt dla Provinzia, che fajará i controi tles strotöres por ciaré sce i standarg damaná vëgn tignis ite por l’assegnaziun dl logo.

Le budget metü a desposiziun dala Provinzia al’Academia Europeica de Balsan (EURAC) por l’ann 2015 é de 450 mila euro. I scioldi gnará dá a cater proiec d’inrescida sön l’ecologia, le telescialdamënt, le plurilinguism y le sparagn energetich.

Por ti dé na sbürla ala Plose sciöche destinaziun turistica á la Plose Ski Spa tut la dezijiun da baraté i dui lifc da scagns cun na furnadoia unica nöia che dess porté sön la Piza Vansuro (Pfannspitze) sura Porsenú. La Junta provinziala á dé n arat positif al proiet che ará n efet positif ince sön la contrada, podará gní adorada por jites y a n mioramënt dl sorvisc dal punt d’odüda economich.

Tröc ascutadus, reladus dër cualificá y na seria de idees nöies - le bilanz dl convëgn en ocajiun dl De di museums dl vedl Tirol é positif. La manifestaziun vëgn metüda a jí vigni ann dales Repartiziuns Museums dl Tirol, Südtirol y Trentin adöm al’Euregio. Chësc iade é le de gnü organisé a Ciastel Tirol por inrescí ci che i mueums pó fá por la pêsc tla sozieté.

La Repartiziun Laur dla Provinzia y la Direziun regionala dl Paiern dl’Agenzia por le laur s’á incunté incö (28/09) a Balsan por n convëgn sön le marcé dl laur, tratan chël che al é gnü firmé n’acordanza sön na colaboraziun plü strënta por ci che reverda le barat de personal spezialisé.

De plü suralüsc sön trëi cantiers stradai dla Val Badia á fat dan da püch i assessurs competënc Tommasini y Mussner adöm cun i responsabli tecnics y i ombolc dla Val Badia. Dötadöm é i laurs bele gnüs stlüc jö, al vá ciamó debojëgn de de pici intervënc de sistemaziun dles strades provinziales da Rina, San Martin y Pidrô. L’investimënt complessif é de 8,5 miliuns de euro.

"Nuj" ie l titul de na revista che ie unida ora per l ann de scola y de stude nuef. La revista dëssa spidlé la cultura jëuna y creativa te Südtirol. N vënderdi, ai doi de utober tla ustaria "Traube" a Urtijëi prejenterà l assessëur Philipp Achammer l cunzet nuef dla revista deberieda cun la redazion y espunënc dl mond artistich.

L’adoranza di lingac y l’identité linguistica tl Südtirol é tl zënter dl Barometer linguistich che l’Istitut provinzial de statistica dl ASTAT presentará en mercui 30 de setëmber a Balsan. L’assessuria provinziala Waltraud Deeg dauriará la manifestaziun.

Les sfidades che messará gní tratades te cört y lunch tëmp y n svilup sostenibl che toles ite düc i seturs – chëstes é stades les tematiches tl zënter dla secunda incuntada dla mësa permanënta sön les Dolomites patrimone UNESCO. Cina le 2016 mëssel gní definí na strategia de gestiun globala dl teritore sot a sconanza da ti presenté al’UNESCO.

La liberté de stampa é stada la tematica prinzipala dl De dla Cultura Ladina 2015 tigní incö (24/09) a Balsan. L’assessur Mussner á sotligné l’importanza dl dialogh danter media y politica y la gran responsabilité di media por la sozieté. L’espert Gallmetzer á referí sön l’importanza de n jornalism investigatif, la iurista Summerer á baié dl aspet iuridich dl dërt d’espresciun.