Atualità

Cinch posć culturai che ne é normalmënter nia daverc al publich pó gní vijitá ai 20 de setëmber en ocajiun dl De europeich dl patrimone. „Chëstes operes storiches nes dá la poscibilité da descurí le tëmp passé, mo ince da ponsé al dagní“, insciö l’assessur por i bëgns culturai Florian Mussner incö (14/09) ala presentaziun dla scomenciadia. Da odëi sarál ince na ciasa retica.

Le Departimënt Educaziun y Cultura Ladina dla Provinzia de Balsan inviëia düc i interessá al De dla Cultura Ladina olache an baiará de „Liberté de stampa: dërt d’informaziun y responsabilité di media“. Le convëgn gnará tigní, en presënza dl assessur Florian Mussner y de tröc esperc dl monn di media, en jöbia ai 24 de setëmber dales 09.00 inant tl Palaz Widmann a Balsan.

Sot le moto „Vire, gusté y sintí l’Euregio Tirol-Südtirol-Trentin“ gnarál tigní ai 19 de setëmber a Dala/Hall tl Tirol la gran festa dl’Euregio. La popolaziun dles trëi provinzies é inviada a tó pert ala scomenciadia.

Les sfidades dla sanité sará tl zënter de n convëgn söi 35 agn dl ativité dl Tribunal por i dërc di amará che gnará tigní ai 18 de setëmber tl Auditorium dl Palaz provinzial 12 tla strada via Gamper 1 a Balsan. Al convëgn tolarál pert l’assessuria provinziala Martha Stocker y le diretur general dl’Aziënda sanitara Thomas Schael.

Tl contest dla campagna de sensibilisaziun sön la donaziun de organs vëgnel metü da jí ai 15 de setëmber na sëra d’informaziun dales 20.00 a Badia cun l’assessuria Martha Stocker, le primar Marco Pizzinini, le neurologh Gregorio Rungger y le diretur da denant dl raiun sanitar da Bornech Davide Willeit. Tl zënter dl convëgn sarál ince les impresciuns personales de paziënc atocá y de sü familiars.

Pröma incuntada ofiziala incö (10/09) a Balsan danter le presidënt dla Provinzia Arno Kompatscher y chël dl Land austriach dl Vorarlberg Markus Wallner. I dui suranstanc á sotligné l’importanza da „lauré adöm por se fá sintí deplü tl contest europeich.“ Danter les tematiches tratades él ince sté la Macroregiun alpina, l’economia y la formaziun.

Le passaje de arees militares ala Provinzia sciöche barat por abitaziuns nöies por i soldas: chësc é le contignü de na convenziun danter le Minister dla Defenüda y la Provinzia de Südtirol stabilida bele dan da ot agn y che vëgn sëgn portada inant cun n’acordanza ajuntiva y la deponüda dla pröma pera por la costruziun de abitaziuns nöies incö ai 10/09 a Maran en presënza dl presidënt Kompatscher.

Le presidënt dl Land Vorarlberg Markus Wallner sará indoman, jöbia ai 10 de setëmber, en vijita dal presidënt dla Provinzia Arno Kompatscher a Balsan. Tratan chësta incuntada gnarál traté la strategia unitara europeica por i raiuns dles Alpes y le svilup dla competitivité y azessibilité dles provinzies. Daldô presentará i dui presidënc na tuta de posiziun deboriada.

Na fontana d’aconsiamënt importanta por dötes les domandes che reverda l’edcaziun é le Telefon di geniturs. Incö (09.09) él gnü presenté i dac atuai: insciö él gnü registré l’ann passé indöt 1064 telefonades, dantadöt por ci che reverda domandes sön l’educaziun, la scora y la despartiziun di geniturs. Tres de plü domandes vëgn fates en relaziun al’adoranza di fonins da pert di mituns y jogn.

Ciamó cina ai 13 de setëmber y spo dai 3 de otober cina la fin de jená dl 2016 sarál poscibl da vijité tl Museum Natöra da Balsan la mostra speziala „Lëdi y salvari“. Da odëi él de plü retrac de spostamënc de tiers salvari y de coridors naturai dles Alpes y dl’America dl nord che dess sensibilisé sön le spostamënt lëde di tiers y sön le mantignimënt dla biodiversité.