Atualità

Le presidënt dla Provinzia Kompatscher y i assessurs Mussner, Tommasini y Achammer á premié incö (ai 5 de setëmber) tl contest dl De dl’Autonomia i mius maturanc dl ann de scora 2014/15. Te chësta l’ocajiun ti fej la Junta provinziala ince les mius aodanzes a düc i scolars che metará man en lönesc ai 7 de setëmber l’ann de scora nü.

La resistënza al nazifascism á albü tl Südtirol formes desvalies che gnará analisades da trëi di esperc de storia locala plü conesciüs tratan n convëgn ai 5 de setëmber a Ciastel Tirol en presënza dl presidënt dla Provinzia Arno Kompatscher. Ara nen jará ince dl rode dla resistënza sön le svilup dl’autonomia südtiroleja.

I 40 agn dl’Intendënza Ladina, l’adatamënt dl sistem scolastich ladin ala reforma statala, i conzec d’integraziun y dles inciaries da ciasa é stá i punc zentrai dl De dla scora ladina organisé incö (03.09) tla sënta dla scora mesana a Urtijëi. „La scora ne dess nia ma ester na fontana dl savëi, mo ince de valurs y de vita“, á recordé l’assessur Mussner.

Les novités che reverda la Cuta comunala sön i imobiliars CCI (IMI) y la lege sön i apalc nöia: chëstes é stades les tematiches tratades dal’assessuria Waltraud Deeg y dal assessur Arnold Schuler tratan n’incuntada dan da püch dla Consulta por les families, che se damana plü sconanza por les families cun tröc mituns.

Tres le Südtirol s’ativëia la Talia por sostigní la Germania pro l’acoliënza provisoria de migranc: le Payern á damané n aiüt logistich ala Provinzia de Balsan te chësta perioda d’emergënza y le presidënt Kompatscher á ciafé löm vërda dal Govern talian por ospité por n valgügn dis na pert di migranc che é söl iade por i Paisc Todësc.

En gaujiun dl scomenciamënt dl ann scolastich nü organisëia le Zënter de competënza y i Zëntri por la promoziun dl lingac che se crüzia dl’integraziun di scolars che vëgn da d’atri Paisc n convëgn d’ajornamënt por i insegnac. L’incuntada gnará a se le dé en lönesc ai 7 de setëmber dales 14.00 tl’Eurac a Balsan en presënza di assessurs Mussner, Tommasini y Achammer.

Cun na conferënza pedagogica á metü man incö al 1 de setëmber l’ann scolastich 2015/16 dles scores de musiga. I assessurs por la scora Florian Mussner y Philipp Achammer á inaudé la sajiun musicala nöia adöm cun le diretur de Departimënt Peter Höllrigl y la direturia provinziala dles scores de musiga Irene Vieder tla sënta dla scora profescionala por l’agricoltöra a Auer.

Siegfried Rainer y Theodor Rifesser mëina nchin ala proscima veles ai 15 de nuvëmber i destins di chemuns de Natz-Schabs y Urtijëi. L assessëur provinziel per i chemuns à rujenà ncuei, prim de setëmber, cun i doi aministradëures de chemun per nriescer coche la sta cun i lëures ti doi chemuns.

Ares metará man en jöbia ai 03/09 a Roma les tratatives danter la Provinzia y l’aziënda Poste Italiane por la reorganisaziun dl sorvisc dla posta tl Südtirol. „L’obietif – insciö á splighé le presidënt Kompatscher – é chël da surantó plü competënzes che dess gní finanziades tres le pachet di 100 miliuns al’ann preodü dal’Acordanza de Milan.“

La Junta provinziala á tut la dezijiun da aprové un n miliun de euro implü por l’assunziun y la metüda a desposiziun de personal dër cualifiché tles impreses dl Südtirol. Do da n ann é le pröm bilanz dl proiet scomencé dala Provinzia positif: la pröma dotaziun de 1,6 miliuns de euro é bele gnüda adorada sö por ti garantí l’ocupaziun a 30 porsones dër cualificades te 27 imprejes.