Atualità

L’acordanza arjunta tl ciamp dl’integraziun danter l’Eurac y le Sorvisc de coordinamënt por l’integraziun sará la tematica prinzipala de na conferënza stampa a Balsan en mercui ai 2 de setëmber en presënza dl assessur competënt Philipp Achammer y dla direturia dl Departimënt Vera Nikolussi Leck.

La pröma terassa panoramica dles Dolomites patrimone UNESCO é gnüda inaugurada incö ai 27 d’agost dal assessur y presidënt dla fondaziun Richard Theiner sön la munt dl Strudelkopf tl raiun de Toblach tl parch natural Fanes-Senes-Braies. Le conzet y i laurs de costruziun é gnüs manajá dantadöt dal Ofize Parcs naturai dla Provinzia.

Do n’intervenziun da pert dl assessur Florian Mussner á l’ÖBB mudé l’orar de partënza dles ferates de coinzidënza sön le Prener. Ti ultimi dis ê, por gaujia de laurs, la coinzidënza söl Prener por i viajadus da Balsan tl vers de Desproch tomada fora.

Dal 1 de setëmber dl 2015 él tarifes nöies, na tassa d’emisciun da paié ma un n iade y na tarifa al de mascimala por le Südtirol Pass, sciöche ince tarifes nöies por tó para la roda. „Le sistem dles tarifes dl Südtirol é en confrunt cun i sistems tarifars europeics le plü orienté tl vers di anuzadus y, calcolé sön basa anuala, ince chël a miú prisc“, insciö l’assessur Florian Mussner.

Cumpedada adöm é la trata complessiva de düc i tuní dl Südtirol lungia indöt 60 chilometri. Por garantí la netijia di parëis y dles strades al’intern dles galaries á la Junta provinziala tut la dezijiun inier (ai 25 d’agost) da scrí fora na bandida de concurs europeica por le sorvisc por i agn 2016 y 2017.

Le Departimënt dla scora y cultura de lingaz talian organisëia en jöbia ai 3 de setëmber al’EURAC n convëgn sön l’aprendimënt di lingac.

Por l’ocajiun dl De dl’Autonomia, che sará ai 5 de setëmber, dauriará l’Aministraziun provinziala, la Junta y le Consëi provinzial sües portes ai zitadins. Le program dl De dl’Autonomia (y dla porta daverta) 2015 gnará presenté cun na conferënza stampa ai 31 d’agost. La plata internet cun dötes les informaziuns atuales é da ciafé sot a: http://www.provinzia.bz.it/de-autonomia/

En ocajiun dl scomenciamënt dla ann nü dles scores de musiga vëgnel metü da jí en mertesc, al 1. de setëmber dales 14.45 tla sënta dla scora profescionala por l’agricoltöra a Auer n convëgn por düc i maestri de musiga dles scores de musiga ladines y todësces. Ala manifestaziun tolarál ince pert l’assessur Achammer, l’intendënt Höllrigl y la direturia dles scores de musiga Vieder.

Cina ai 22 de otober dl 2015, por gaujia de laurs sön la trata Rosenheim-Kufenstein, gnarál antizipé de sis menüc la partënza de n valgönes ferates ÖBB dal Prener en direziun Desproch. Por chësta rajiun ne sarál nia poscibl por i passajiers de plü ferates che röia da Balsan da tó la coinzidënza por Desproch.

La Junta provinziala á aprové incö (25/08) le test dl dessëgn de na lege europeica „formala“ che definësc la prozedöra da tigní ite por atué les normatives europeiches tles materies de competënza dla Provinzia y por adaté l’ordinamënt iuridich provinzial a chël europeich. Al dess gní metü adöm cina la fin dl 2017 n ddl „sostanzial“ por cöie adöm te öna na lege dötes les desposiziuns provinziales c