Atualità

Le proiet dla junta provinziala da amplié y renforzé la rëi a banda leria tl Südtirol vá inant. Por jí inant cun le program di laurs preodüs por le 2015, á l’esecutif aprové incö (ai 25 d’agost) i intervënc proponüs dala RAS, meton a desposiziun feter 1,4 miliuns de euro.

Por adaté les bandides de concurs tl setur dl trasport publich ales normes europeiches y por renforzé les competënzes legislatives primares dla Provinzia tl setur dla mobilité publica ti confrunc dl Stat á la Junta provinziala aprové incö (25/08) n dessëgn de lege nü sön proposta dl assessur Mussner y che reverda döt le setur. Insciö vëgn dötes les desposiziuns dl setur metüdes te öna na lege.

La lege provinziala nöia sön la partezipaziun y l’inclujiun dles porsones cun handicap á le fin da tó ite les porsones interessades deplü tla vita soziala. La junta provinziala á aprové incö, a öna cun chësc prinzip, le test de lege te n “lingaz saurí”.

Nce chëst ann vëniel metù a jì da pert dl Departimënt Educazion y Cultura Ladina l’ancunteda tradiziunela dl Dì dla Scola Ladina per i nsenianc, genitores y i sëurastanc dla scola. La tematica prinzipela de chëst ann sarà l cunzet de "home?work". L assessëur per la scola ladina Florian Mussner y l intendënt Roland Verra giaurirà ufizialmënter l ann de scola 2015/16 ai 03/09 dala 09.00 a Urtijëi.

Dal scomenciamënt dla campagna „Spende Leben/Dona vita“ á 335 abitanc dl Südtirol detlaré süa desponibilité, tres na detlaraziun d’orenté, da dé inant i organs. „Le laur d’informaziun jará inant ince les proscimes edemes y i sperun da podëi ciamó sensibilisé tröc zitadins sön chësta tematica“, insciö l’assessuria Stocker che anunziëia l’arlunjamënt dla campagna.Ai 15/09 sëra d’informaziun a Badia.

Ai 11 de setëmber 2015 uniral tenì la cuarta edizion dl cunvëni "valivanza dla chances danter ëiles y ëi tla rë", urganisà dala Cumiscion provinziela per la valivanza dla chances danter ëiles y ëi y dal Servisc per l’ëiles. L’iscrizion al cunvëni vën stluta ai 4 de setëmber 2015 pra l Servisc per l’ëiles (tel. 0471 416950, e-mail: serviziodonna@provincia.bz.it).

Dan da püch á l’assessuria por la sanité y les politiches soziales, Martha Stocker, incunté na delegaziun di doturs de medejina generala por analisé la chestiun che reverda le contrat nü de transiziun dla categoria. L’incuntada á ponü la basa por les tratatives che reverda le contrat integratif provinzial.

Le tru dles rodes da Sanciana a Lienz, n video sön les normes iuridiches da respeté sön les trates dles rodes danter plü naziuns, l’ombolt da denant de Funes Robert Messner, ideadú dl’oferta turistica sostenibla „Alpine Pearls“: chisc é i temesc dl mëis publicá sön la plata internet dl’Euregio Tirol-Südtirol-Trentin.

Tratan la conferënza stampa, che sará en jöbia ai 27 d’agost, gnarál presenté i proiec inovatifs che gnará finanziá chësc ann cun i fonds provinziai por la sanité. Al tolará pert l’assessuria Martha Stocker y le diretur general dl’Aziënda sanitara, Thomas Schael.

Sön la munt dl Strudelkopf (nia dalunc da Toblach) tl parch natural Fanes-Senes-Braies á l’Ofize Parcs naturai, adöm cun la Fondaziun Dolomites UNESCO y de plü ofizi provinziai, realisé la pröma terassa panoramica dles Dolomites patrimone mondial. L’assessur Richard Theiner, presidënt dla Fondaziun, tignará l’inauguraziun dl punt panoramich nü en jöbia ai 27 d’agost.