Atualità

Le De dl Tirol da iniann vëgn metü da jí sot al slogan „La ciasa nöia dl’Euregio – intlujiun impede estlujiun“. L’evënt vëgn metü a jí tradizionalmënter tl contest dl Forum europeich de Alpach le pröm fin dl’edema dla manifestaziun, chësc iade en domënia ai 23 d’agost. Por la Provinzia dl Südtirol tolarál pert le presidënt Arno Kompatscher y l’assessur Florian Mussner.

La Junta provinziala á aprové da püch sön porposta dl assessur por le patrimone Florian Mussner da cumpré la strotöra „Marienhof“ a Bornech. „Insciö sarál poscibl da reorganisé i sorvisc sanitars locai diretamënter dlungia l’ospedal da Bornech“, spliga le presidënt dla Provinzia Arno Kompatscher y l’assessuria Martha Stocker.

8 miliuns implü por le sostëgn provinzial ales families por le 2015 é gnüs metüs a desposiziun dala Provinzia. La soma é gnüda metüda da püch dala Junta provinziala tl bilanz supletif. „Cun chësta soma ajuntiva él poscibl da ademplí i bojëgns de bilanz por le 2015 y da finanzié ince l’oferta d’assistënza d’isté di mituns“, sotlignëia l’assessuria Waltraud Deeg.

Da inier (17 d’agost) cina la fin d’agost sarál poscibl da dé jö les domandes por fá l’ejam da iagher tla perioda da d’altonn. Les iscriziuns pó gní fates cun la Cherta di sorvisc sön la plata internet dla Rëi Zivica dl Südtirol.

Dl 1987 á l’alpinist Willy Costamoling descurí tl ander de Conturines perts de n schelet de na laurs preistorica. Co êra pa fata? Y cares é pa les desfarënzies da les laurs atuales? A chëstes domandes ti jará a funz le paleontologh Herwig Prinoth te na conferënza organisada dal Museum Ladin ai 21 d’agost dales 21.00 tla Ciasa dles uniuns „J.B.Runch“ a San Ciascian. L’entrada é debann.

L’Ofize Parcs naturai á conzepí por le pröm iade material didatich por les scolares y i scolars dles scores mesanes che trata a funz la tematica dles Dolomites patriomone mondial UNESCO y sües particolarités naturales y geologiches.

Te avisa döes edemes dai 28 ai 30 d’agost gnarál a se le dé la secunda ediziun dl Dolomites UNESCO LabFest a Auronzo de Cadore. Al se trata de n festival tematich cun tröpes ativités culturales y de aorela cörta, cun mostres, incuntades, workshop y percursc de gastronomia. La tematica zentrala dl festival sará i confins, storics y personai.

Ince les scores de musiga s’arjigna ca por le scomenciamënt dl ann de scora nü 2015/16. Tla sënta dla Repartiziun Personal dla Provinzia a Balsan él gnü surandé ai 6 y 7 d’agost indöt 59 di 86 posć a desposiziun. Di cinch posć resservá al grup linguistich ladin é ciamó trëi lëdi.

Sensibilisé sön n rovëne plü sigü é un di obietifs prinzipai dla campagna „No Credit“. Chësc findledema de Santa Maria dai Ciüf gnarál indô partí fora ai motoziclisć sön i jus dl Rombo y dl Stielva jorantis sön le rovëne sigü. Sön dötes les trates dl Südtirol gnarál controlé deplü dales forzes dl ordinn. Ince l’ADAC dl Payern segnalëia i controi.

Nudrí le planët, energia por la vita: Chisc é i dui messaji zentrai dla Expo 2015 a Milan. Les tematiches zentrales ne vëgn nia ma presentades ti 145 pavillons di Paisc che fej para, mo ince tratan seminars y incuntades. Le primar Lucio Lucchin da Balsan á tigní chisc dis n referat sön la temtica dl nudrimënt y á lauré fora n conzet por n nudrimënt plü sann.