Atualità

Les condiziuns de vita di prijoniers de vera y les conseguënzes dles porjiuns tles valades y ti paisc é les döes tematiches prinzipales sön le portal internet dla Gran Vera dl’Euregio Tirol-Südtirol-Trentin. Ince chësc iade vëgnel presenté la teamatica aladô de trëi domandes y respostes. Da lí do, sciöche ince ti mëisc passá, sot ala seziun de „Let’s talk“ de www.14-18.europaregion.info.

Por düc i apascioná dl sport dl arpizé él gnü realisé a Bornech la palestra por l’arpize y le bouldering scolastich „K3“, na strotöra moderna y inovativa. Le frabicat nü é gnü surandé incö, vëndres ai 31 de messé ai gesturs.

Istituzionalisé la colaboraziun che reverda le trasport de marcianzies tl’Euregio: chësta é la posiziun coletiva di assessurs dl’Euregio Florian Mussner (Südtirol), Ingrid Felipe (Tirol) y Mauro Gilmozzi (Trentin) do l’incuntada da incö (31/07) a Balsan. Cun i suranstanc dles Ciamenes de comerz di trëi raiuns á i assessurs debatü ince dl transiamënt proibí de seturs de marcianzies tl Tirol.

L’assessuria provinziala por la sanité Martha Stocker á presenté incö ai 31 de messé tl contest de na conferënza stampa a Palaz Widmann les diretives nöies por la fecondaziun „eterologa“. Al á tut pert al’incuntada cun la stampa ince le primar dl repart de ginecologia dl ospedal da Bornech, Bruno Engl.

Tl mëis de agost s’incuntará la Junta dui iadi, en mertesc ai 11 y en mertesc ai 25 d’agost. Al ne é preodü degönes sentades por en mertesc ai 4 y en mertesc ai 18 d’agost.

Escursciuns cun les rodes vëgn dër aprijades: porchël gnarál amplié ti fins dl’edema dl mëis de agost la linia dla ferata tla Alta Val de Puster cun cater iadi implü por ti jí adincuntra al numer plü alt de ziclisć che jará cun la ferata. „Cun chësta mosöra orunse ti dé na maiú lerch ai ziclisć y sostigní chësta forma de turism ecologich y sportif“, sotlignëia l’assessur Florian Mussner.

Euforia, podëi, impotënza y agonia é i temesc de na mostra speziala che gnará daurida ai 9 d’otober a Balsan, cun chëra che la Repartiziun Cultura ladina presentëia i avenimënc dla Gran Vera y la crudelté dla violënza en general te n’elaboraziun artistica nöia. Indöt gnarál mostré les operes d’ert di ot davagnadus dl concurs artistich da inann, che é gnüs chiris fora da püch.

Sce le mëis de messé, le plü cialt dal mëteman dles mosoraziuns, se röia cun n’aria frësca, gnará le cialt da d’isté indô a se fá sintí dai proscims dis cun temperatöres dër altes tl Südtirol che podará rové cina ai 35 degrá. Chësta la previjiun de Dieter Peterlin, le meterologh dl Sorvisc Meteo dla Provinzia.

Ciamó cina ai 15 de setëmber pó i abonamënc abo+ por scolars y studënc gní adorá. Por düc chi che ó renové l’abo+ por le proscim ann de scora o academich pó le fá online paian ince la cuota anuala dër comot dal computer. „Les domandes online funzionëia bun, ares pó gní manajades debota y ares smendrësc la burocrazia“, insciö l’assesur competënt Mussner.

Por sotligné l’ampliamënt dl’Autonomia dl Südtirol y la recuperada y metüda en segurëza dles competënzes dla Provinzia él intergnü incö ai 30 de messé le presidënt dla Provinzia Arno Kompatscher tratan n’audiënza dan la Comisciun parlamentara por les Regiuns. Implü á le presidënt ince sostigní so impëgn por l’aprovaziun dles normes d’atuaziun, por che le Südtirol pois ademplí sües responsabilités.