Atualità

Döes é les scomenciadies culturales por mituns sön le program dl Museum Ladin tratan l’isté: da öna na pert vëgnel organisé vigni mercui le domisdé "Sön les pedies dla laurs preistorica" dal Museum Ladin "Ursus Ladinicus" a San Ćiascian, dal’atra pert organisëia le Museum Ladin "Ćiastel de Tor" le danmisdé “Le museum por mituns” vigni jöbia de messé y agost. La prenotaziun é nezesciara.

Ot é i morins restrotorá tla “Val di murins” a Lungiarü che vëgn anuzá ciamó aldedaincö en pert dai paurs dl post y che é deventá cun le passé dl tëmp ince n’atraziun por i ghesć interessá ala cultura da paur da zacan y d’al dedaincö. Le Museum Ladin Ciastel de Tor pita ince por chësc isté escurjiuns sides tal Val di murins co tl Museum Ladin.

Dui termins, chësta edema, por le presidënt dla Provinzia de Balsan, Arno Kompatscher: en jöbia ai 2 de lugio é söl program a Roma n’aldiziun al’Autorité antitrust por ci che reverda la fujiun danter SEL y AEW, en vëndres ai 3 de lugio sará le suranstant dla Junta a Viena por incunté i presidënc Heinz Fischer y Sergio Mattarella.

La Provinzia, le CAI y l’AVS vá inant adöm tla prozedöra de spartiziun dles conzesciuns por la gestiun dles 25 üties da munt de proprieté provinziala. Incö (30 de jügn) á la Junta aprové la convenziun che regolamentëia chësta colaboraziun y la surandada dla gestiun dles üties. L’acordanza nöia gnará sotescrita ai 2 de lugio dai presidënc de CAI y AVS y dal presidënt dla Provinzia a Balsan.

Le svilup y l’impostaziun nöia dla prevenziun y dl’assistënza sanitara tl Südtirol é i obietifs prinzipals dl Plann sanitar provinzial nü 2016 - 2020 che gnará realisé ti proscims mëisc. Sön la basa dles informaziuns portades dant dal’assessuria Martha Stocker á la Junta provinziala aprofondí incö (ai 30 de jügn) i proscims vari che reverda l’elaboraziun dl documënt strategich.

La Junta provinziala á nominé incö (ai 30 de jügn) Thomas Mathà sciöche diretur nü dl’Agenzia por i provedimënc y la verda di contrac publics de laurs, sorvisc y fornidöres. L’inciaria piará ia indoman dal 1 de lugio y ará na dorada de cinch agn. Thomas Mathà é sté cina sëgn le diretur dl Departimënt Sanité, Sport, Politiches soziales y Laur.

Ince les Dolomites patrimone mondial UNESCO é stades tl zënter dla reuniun da incö (30 de jügn) dla Junta provinziala. Le govern provinzial á tut la dezijiun da istituí n grup de laur d’esperc por le monitoraje dl’atuaziun di obietifs strategics tla pert südtiroleja dl patrimone sconé dal UNESCO. Aprová ince i 100mile euro de spëises aministratives por le 2015.

La majera presënza dl’ëiles ti cunsëies y tla jontes de chemun do l’ultima veles y l ideal de belëza feminila ie la tematiches prinzipeles de chësta edizion nueva dla plata de nfurmazion ëresFrauenInfoDonne, dat ora dala Cumiscion provinziela per la valivanza dla chances danter ëiles y ëi y dal Servisc Ëiles dla Provinzia.

Concretisé y aumenté les poscibilités de colaboraziun culturales danter les provinzies dl’Euregio: i assessurs por la cultura dl Tirol, Südtirol y Trentin s’á incunté incö domisdé ai 29 de jügn a Desproch por traté les oportunités da lauré adöm tl setur cultural. Tres de plü sará les scomenciadies metüdes da jí y planificades adöm dai trëi raiuns.

Impröma na spligaziun dl svilup geologich dles Dolomites da pert de n espert de paleontologia dl Museum, daldô n’escurjiun geologica cun n acompagnadú tl Parch natural Pöz-Odles: chësta oferta gnará pitada dal Museum Ladin Ciastel de Tor vigni mertesc dai 30 de jügn inant cina al 1 de setëmber dl 2015.