Atualità

Ai 29 de lugio sarál l’aniversar di 25 agn dala mort de Bruno Kreisky. Por chësta ocajiun inviëia le Archif provinzial a n’incuntada de stüde ai 12 de jügn che jará a funz ala relaziun de Bruno Kreisky cun le Südtirol. Tla Ciasa Kolping da Balsan gnarál tigní de plü referac de plü esperc dla storia locala y internazionala. Al sará ince presënc le presidënt Kompatscher y l’assessur Mussner.

Le plann dal inom „Juncker“ y sües poscibilités por le Südtirol y por l’Euregio é stades tl zënter dles incuntades da incö (ai 4 de jügn) dl presidënt dla Provinzia Arno Kompatscher a Bruxelles. N’atra tematica é stada le program FESR, che pó pié ia ince por l’Uniun Europeica.

Zirca 11mile frabicac zertificá dal scomenciamënt dl proiet CiasaClima, de chisc söporjö 1.400 ma l’ann passé, na fondamënta sigüda cun n volum d’afars che crësc y n dagní cun manco prozedöres burocratiches. Chisc é i punc plü importanc dl bilanz dl’Agenzia CiasaClima presentá incö (ai 4 de jügn) dal assessur Richard Theiner.

A na sëra d’informaziun cun la presentaziun de n liber nü y de plü referac cörc sön la Pröma Vera Mondiala inviëia la Biblioteca provinziala Teßmann de Balsan ai 09 de jügn dales 20.00 inant. Adöm cun i editurs sarál ince presënc i trëi assessurs por la cultura.

„Adoziun: na dezijiun cosciënta“ á inom le curs de preparaziun por pers che se arjigna ca a n’adoziun y che vëgn organisé dal Sorvisc Adoziuns sön inciaria dla Repartiziun Politiches Soziales. Le curs é ponsé por pers che é interessá a n’adoziun o che é tl adoté mituns. Les iscriziuns é bele davertes.

www.14-18.europaregion.info é la misciun che porta al portal web dl’Euregio Tirol-Südtirol-Trentin dediché al centenar dla Gran Vera. Tl mëis de jügn vëgnel ejaminé da plü daimpró l’economia finanziara tratan la Gran Vera, cun l’emisciun de papiers de valüta statai y i pröms voucher dl Comun de Balsan.

„Ester na pert amesa la sozieté, y nia ma na pert che alda lapró“: chësc é le moto dl dessëgn de lege nü sön la partezipaziun y l’intlujiun dles porsones cun handicap tl Südtirol y che é gnü aprové da püch dala Junta provinziala. Incö, mercui ai 3 de jügn,él gnü presenté les tematiches prinzipales dla lege nöia, le percurs che portará al’aprovaziun y le test de lege te na forma scemplificada.

Prësc set agn é Elsa Zardini stada a cé dl’Union Generela di Ladins dla Dolomites. Cun la fin de ma ára dé jö süa inciaria. „I oress rengrazié la presidënta Zardini por so laur de volontariat a bëgn dla cultura ladina y ince por le clima de colaboraziun tres produtif y positif“, insciö l’assessur por la cultura ladina Florian Mussner.

Dui films di auturs Hans Albala (Viena) y Bruno Jori (Maran) gnará mostrá en vëndres, ai 5 de jügn dales 20.00 tla Biblioteca Teßmann da Balsan. La moderaziun y presentaziun dla sëra sará tles mans di auturs Ada Zapperi Zucker y da Martin Hanni. La forza dl’ega y dla natöra sará döes dles tematiches prinzipales dla manifestaziun.

Da en lönesc, al 1. de jügn dl 2015 pól ma plü gní arlungé o damané do le Südtirol Pass abo+ por l’ann de scora o de stüde online sön la plata internet http://www.suedtirolmobil.info/. „A chësta moda vëgnel smendrí la burocrazia por les families, les scores y l’aministraziun publica y an sciafia da ciafé l’abo te cört tëmp", sotrissëia l’assessur por la Mobilité Florian Mussner.