Atualità

Ai 12 de má á les trëi Intendënzes adöm al Zënter d’informaziun „Europe Direct Südtirol“ organisé le Dé dl’Europa tl zënter cultural Grand Hotel de Toblach. Plü co 500 maestri y studënc á tut pert ala manifestaziun.

Indöt 1300 porsones cun handicap á tut pert incö (12 de má) ala 32ejima ediziun dla festa dl sport y dla lidëza a Altenburg dlungia Kaltern. La scomenciadia é gnüda organisada dal Ofize Porsones cun handicap dla Provinzia en colaboraziun cun l’assoziaziun „Lebenshilfe“ y cun la scora profescionala por profesciuns soziales „Hannah Arendt“.

Inier él gnü benedí (12 de má) döes ciampanes nöies dla capela de Ćiastel Tirol che é dedicades ai Sanc Pancrazio y Elisabeth. Ala zerimonia de benedisciun al tut pert danter l’ater l’assessur Florian Mussner y le diretur dl Museum de Ćiastel Tirol, Leo Andergassen.

Mostres, vijites, rapresentaziuns teatrales y artejanales, jüc da stomé, musiga, festes de families, workshops, discusciuns sön l’ert, cianté deboriada y tröpes d’atres scomenciadies: chësc é le program dër rich por mituns, jogn y families en gaujiun dl Dé internazional di Museums en domënia, ai 17 de má dl 2015. L’entrada é debann te düc i museums che fej para.

Cun „Spread“ él ince na scomenciadia dl Südtirol che fej pert di 64 proiec che ciafará n sostëgn finanziar tres le program de promoziun culturala europeich „Creative Europe“. Le proiet „Spread“ é na cooperaziun danter la Fondaziun Gustav Mahler, le „Monteverdi Choir and Orchestras“ de Londra y n’orchestra jonila dai Paisc Todësc.

La Junta provinziala á indô contesté n provedimënt dl’Agenzia dles doganes che ne respetëia nia le Statut d’Autonomia y sües normes d’atuaziun. La Junta provinziala á insciö tut la dezijiun incö (12 de má) da fá recurs cuntra les mosöres stabilides dala Direziun dles doganes. Bele l’ann passé â le TAR azeté le recurs dla Provinzia.

La Junta provinziala á definí incö (12 de má) i componënc nüs dl Consëi d’aministraziun dl ABD Airport Spa, na sozieté inhouse dla Provinzia che manajëia les infrastrotöres, i sorvisc y i implanc dl aeroport da Balsan. Sciöche presidënt nü dl CdA él gnü nominé Otmar Michaeler.

La Jonta provinziela à numinà Theodor Rifesser cumisser dl Chemun de Urtijëi. Rifesser, ex diretëur dl Istitut pedagogich ladin y respunsabl dl Departimënt ladin dla Facultà de Scienzes dla furmazion dla ULB (Università Liedia de Bulsan), menerà l’aministrazion urdenera a Urtijëi nchin che l unirà tenì la lites nueves.

Dan la palsa da d’isté él ciamó preodü de plü incuntades tl contest dl program „Ëres informades“ cina ai pröms de jügn. Chësc proiet vëgn organisé dala Comisciun provinziala por l’avalianza dles oportunités y dal Sorvisc Ëres, adöm cun i Comuns, y á sciöche fin chël da pité informaziuns d’ütl y atuales por les ëres dl Südtirol. N’incuntada ince a La Val ai 3 de jügn.

L’assessuria provinziala por la sanité y les politiches soziales, Martha Stocker, á fat da püch na vijita ala sënta dl’Assoziaziun nazionala di volontars dl sanch (AVIS) tl ospedal da Balsan y á podü costaté le laur intensif che é gnü fat l’ann passé, tratan chël che al é gnü coiü adöm passa 7.900 donaziuns de sanch da 6.080 donadus.